ក្រុមហ៊ុនកម្ពុជា-ចិនរួមគ្នាពន្លឿនកម្មវិធីឌីជីថលនីយកម្ម សម្រាប់ផលិតផលក្នុងស្រុកនៅកម្ពុជា
ក្រុមហ៊ុន Huawei (Cambodia) បានចុះហត្ថលេខាលើអនុស្សរណៈនៃការយោគយល់គ្នា ជាមួយក្រុមហ៊ុន Smart Axiata ដែលជាក្រុមហ៊ុនទូរគមនាគមន៍ឈានមុខគេក្នុងប្រទេសកម្ពុជា។
លោក វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជា កាលពីថ្ងៃទី៨ ខែមីនា ឆ្នាំ២០២៥ បានលើកឡើងតាមរយៈទំព័រហ្វេសប៊ុកផ្លូវការរបស់លោកថា ការចុះអនុស្សរណៈនៃការយោគយល់គ្នារវាងក្រុមហ៊ុន Huawei (Cambodia) ជាមួយក្រុមហ៊ុន Smart Axiata គឺធ្វើឡើងក្នុងគោលបំណងដើម្បីបង្កើតទំនាក់ទំនងភាពជាដៃគូយុទ្ធសាស្ត្រ នៅក្នុងដំណោះស្រាយច្នៃប្រឌិតរួមគ្នារវាងអាជីវកម្មនិងអាជីវកម្ម (B2B) និងពង្រីកទីផ្សារ។
លោកបានគូសបញ្ជាក់បន្ថែមថា ភាគីទាំងពីរនឹងពន្លឿនកម្មវិធីឌីជីថលូបនីយកម្មសម្រាប់ផលិតផលក្នុងស្រុកនៅកម្ពុជា។
ពិធីចុះហត្ថលេខាលើអនុស្សរណៈនៃការយោគយល់គ្នា រវាងក្រុមហ៊ុន Huawei (Cambodia) ជាមួយក្រុមហ៊ុន Smart Axiata ធ្វើឡើងក្នុងអំឡុងសមាជទូរសព្ទពិភពលោក (MWC) ២០២៥ កាលពីថ្ងៃទី៤ ខែមីនា ឆ្នាំ២០២៥ នៅទីក្រុងបាសេឡូណា ប្រទេសអេស្បាញ ដោយមានលោក Sharif Mahfoedz CBO នៃក្រុមហ៊ុន Smart Axiata និងលោក ហ័ង ហឺ (Huang He) នាយកផ្នែក Smart Axiata របស់ក្រុមហ៊ុន Huawei និងធ្វើឡើងក្រោមអធិបតីភាពនិងជាសាក្សីដោយលោក Ziad Shatara នាយកប្រតិបត្តិក្រុមហ៊ុន Smart Axiata លោក Muhammad Adeel Israr នាយកផ្នែកនវានុវត្តន៍ នៃក្រុមហ៊ុន Smart Axiata លោក តឹង ស៊ុយគិន (Deng Shuigen) ប្រធានក្រុមហ៊ុន Huawei Asia Pacific Carrier Sales Business និងលោក ថោវ គ័ងអ៊ាវ (Tao Guangyao) នាយកប្រតិបត្តិក្រុមហ៊ុន Huawei កម្ពុជា។
តាមរយៈអនុស្សរណៈនៃការយោគយល់គ្នានេះ ក្រុមហ៊ុន Huawei Cambodia និងក្រុមហ៊ុន Smart Axiata នឹងធ្វើកិច្ចសហប្រតិបត្តិការរួមគ្នា ដើម្បីបង្កើតភាពជាដៃគូយុទ្ធសាស្ត្រសម្រាប់ដំណោះស្រាយនវានុវត្តន៍ B2B និងការអភិវឌ្ឍទីផ្សារ ជាមួយគោលដៅពន្លឿនឌីជីថលូបនីយកម្មនៃឧស្សាហកម្មក្នុងស្រុកនៅកម្ពុជា។
ថ្លែងក្នុងពិធីចុះហត្ថលេខានេះ លោក Sharif Mahfoedz បានថ្លែងថា ភាពជាដៃគូរបស់យើងជាមួយក្រុមហ៊ុន Huawei ជាការវិវត្តដ៏សំខាន់ដែលនឹងអនុញ្ញាតឱ្យយើងនាំយកនូវដំណោះស្រាយទំនើបៗ ដែលបញ្ចេញសក្ដានុពលថ្មីៗ និងជំរុញកំណើនក្នុងអាជីវកម្មនៅប្រទេសកម្ពុជា។
លោក ថោវ គ័ងអ៊ាវ បានលើកឡើងថា ក្នុងនាមជាក្រុមហ៊ុននាំមុខគេលើសកលលោកលើដំណោះស្រាយបច្ចេកវិទ្យាប្រកបដោយនិរន្តរភាព និងជាអ្នកផ្តល់សេវាហេដ្ឋារចនាសម្ព័ន្ធទូរគមនាគមន៍ដ៏គួរឱ្យទុកចិត្ត Huawei មានមោទកភាពក្នុងការសហការជាមួយក្រុមហ៊ុន Smart Axiata ជំរុញការបង្កើតដំណោះស្រាយឧស្សាហកម្ម B2B។ ជាមួយកំណត់ត្រាសមិទ្ធផលរបស់យើងនៅទូទាំងពិភពលោក ដែលបានជំរុញអាជីវកម្មរាប់មិនអស់ តាមរយៈដំណោះស្រាយបច្ចេកវិទ្យាឌីជីថលទំនើបៗ 5G យើងប្ដេជ្ញាចិត្តក្នុងការនាំយកជោគជ័យទាំងនេះមកកាន់ប្រទេសកម្ពុជា។ តាមរយៈភាពជាដៃគូជាមួយក្រុមហ៊ុន Smart Axiata យើងនឹងប្រើប្រាស់អ្នកជំនាញជាសកលរបស់យើងជាមួយនឹងការយល់ដឹងក្នុងស្រុក ដើម្បីផ្តល់នូវដំណោះស្រាយកម្រិតខ្ពស់ដែលជំរុញសេដ្ឋកិច្ចឌីជីថលកម្ពុជាឆ្ពោះទៅមុខ។
កិច្ចសហការនេះ នឹងរួមបញ្ចូលគ្នានូវហេដ្ឋារចនាសម្ព័ន្ធនិងជំនាញក្នុងស្រុកយ៉ាងទូលំទូលាយរបស់ក្រុមហ៊ុន Smart Axiata ក៏ដូចជាអតិថិជនដ៏ច្រើនជាមួយនឹងបច្ចេកវិទ្យា ICT កម្រិតខ្ពស់របស់ Huawei (មាន 5G, FWA, SD-WAN ជាដើម) និងបទពិសោធឧស្សាហកម្មដ៏សម្បូរបែប។ តាមរយៈការរួមគ្នាបង្កើតដំណោះស្រាយ B2B ភាគីទាំងពីរនឹងនាំមកនូវកម្មវិធីនិងសេវាកម្ម ប្រកបដោយនវានុវត្តន៍បន្ថែមទៀតដល់ឧស្សាហកម្មផ្សេងៗក្នុងប្រទេសកម្ពុជា ដូចជាការផលិត ការជីកយករ៉ែ និង ហិរញ្ញវត្ថុក្នុងសហគ្រាសធំៗ ក៏ដូចជាការនាំមកនូវការច្នៃប្រឌិតដល់សហគ្រាសធុនតូចនិងមធ្យម ដោយផ្តល់សេវាកម្មគ្រប់គ្រងនិងដំណោះស្រាយផ្សេងទៀតដែលនឹងលើកកម្ពស់ប្រសិទ្ធភាពអាជីវកម្មនៅក្នុងប្រទេសកម្ពុជា៕