ចិនបង្ហាញចំណាប់អារម្មណ៍នាំយកស្វាយចន្ទីកម្ពុជា ទៅកាន់ទីផ្សារអន្តរជាតិ
នាព្រឹកថ្ងៃទី១១ ខែមីនា ឆ្នាំ២០២៥ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានទទួលជួបពិភាក្សាការងារជាមួយគណៈប្រតិភូវិនិយោគចិនចំនួន ១៩ ក្រុមហ៊ុន ដឹកនាំដោយលោក លីវ យ៉ុង (Liu Yong) ប្រធានសមាគមអ្នកវិនិយោគវ័យក្មេងនៅទីក្រុងឃុនមីង ខេត្តយូណាន សាធារណរដ្ឋប្រជាមានិតចិន ដោយមានការសម្របសម្រួលពីអ្នកឧកញ៉ា លី ឃុនថៃ ប្រធានសមាគមស្បែកជើងកម្ពុជា។
ក្រុមហ៊ុនទាំង ១៩ នេះមានសកម្មភាពវិនិយោគក្នុងវិស័យកសិកម្ម សុខាភិបាល សំណង់និងអចលនទ្រព្យ បច្ចេកវិទ្យា ថាមពល បោះពុម្ពនិងវេចខ្ចប់ ម្ហូបអាហារ សណ្ឋាគារនិងបដិសណ្ឋារកិច្ច ការគ្រប់គ្រងធុរកិច្ច ការផ្តល់សេវាប្រឹក្សាផ្នែកច្បាប់ លក់និងសេវាថែទាំរថយន្ត និង ការបណ្តុះបណ្តាលវិជ្ជាជីវៈ។ សមាគមអ្នកវិនិយោគវ័យក្មេងនៅខេត្តយូណាន មានសមាជិកសរុបចំនួនប្រមាណ ១៥០០ សហគ្រាស ដែលមានមុខសញ្ញាអាជីវកម្មក្នុងវិស័យផ្សេងៗពីគ្នា ហើយសហគ្រាសទាំងនោះកំពុងមានបំណងពង្រីកការវិនិយោគរបស់ខ្លួននៅក្រៅប្រទេស ជាពិសេសនៅកម្ពុជា។
លោក ជា វុទ្ធី បានលើកទ្បើងពីចំណងមិត្តភាពដ៏ជិតស្និទ្ធ និងយូរអង្វែងរវាងកម្ពុជា និងចិន ដោយរដ្ឋាភិបាលចិនតែងតែជួយឧបត្ថម្ភគាំទ្រដល់ការអភិវឌ្ឍសង្គមសេដ្ឋកិច្ចកម្ពុជា។ ក្នុងក្របខណ្ឌកិច្ចសហប្រតិបត្តិការជំរុញការវិនិយោគ កម្ពុជា-ចិនបានចុះអនុស្សរណៈនៃការយោគយល់គ្នាមួយចំនួន ដូចជា “ច្រករបៀងឧស្សាហកម្ម និងបច្ចេកវិទ្យា” “ច្រករបៀងមច្ឆានិងអង្ករ” និង “ហេដ្ឋារចនាសម្ព័ន្ធសេដ្ឋកិច្ចឌីជីថល” ជាដើម។ លោកក៏បានគូសបញ្ជាក់ពីការវិនិយោគនៅកម្ពុជា ដែលប្រភពទុនវិនិយោគមកពីប្រទេសចិន បានឈរនៅលំដាប់លេខរៀងទី១ ឬទី២ជាបន្តបន្ទាប់ក្នុងរយៈពេលជាង ១ ទសវត្សរ៍ចុងក្រោយនេះ ជាក់ស្តែងក្នុងឆ្នាំ២០២៤ ការវិនិយោគចិនបានរួមចំណែកដល់ទៅប្រមាណ ៥០% នៃទុនវិនិយោគសរុប។ ទន្ទឹមនឹងនេះ លោកបានធ្វើការកត់សម្គាល់ឃើញថា មានក្រុមហ៊ុនចិនធំៗជាច្រើនបានមកបណ្តាក់ទុនវិនិយោគនៅកម្ពុជា នៅក្នុងការអភិវឌ្ឍតំបន់សេដ្ឋកិច្ចពិសេស និងការវិនិយោគក្នុងកន្សោមឧស្សាហកម្មថ្មីៗ ដូចជាការផលិតសម្បកកង់រថយន្ត ការផ្គុំដំទ្បើងបរិក្ខារអេទ្បិចត្រូនិក ការកែច្នៃជ័រកៅស៊ូ។ល។
លោក ជា វុទ្ធី ក៏បានលើកឡើងអំពីការគាំទ្រ និងលើកទឹកចិត្តនានារបស់រាជរដ្ឋាភិបាលកម្ពុជា លើគម្រោងវិនិយោគក្នុងវិស័យស្វាយចន្ទីនៅកម្ពុជា ជាពិសេសគំនិតផ្ដួចផ្ដើមរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងការបង្កើតសួនឧស្សាហកម្មស្វាយចន្ទី ដែលនឹងជួយបង្កើនភាពអំណោយផលនៃបរិយាកាសធុរកិច្ចក្នុងវិស័យអាទិភាពនេះនៅកម្ពុជា។ លោកថែមទាំងបានបង្ហាញពីខ្សែច្រវាក់តម្លៃ នៃឧស្សាហកម្មស្វាយចន្ទី ដែលរាប់ចាប់តាំងពីផ្នែកខាងលើ (upstream) ជាពិសេស ពាក់ព័ន្ធនឹងការប្រមូលទិញ ទីលានសម្ងួត និង ឃ្លាំងស្តុកទុកគ្រាប់ស្វាយចន្ទី។ លោកបានស្នើឱ្យគណៈប្រតិភូ ពិនិត្យលទ្ធភាពចូលរួមវិនិយោគ ក្នុងផ្នែកណាមួយនៃខ្សែច្រវាក់តម្លៃ នៃឧស្សាហកម្មស្វាយចន្ទីនៅកម្ពុជា ឬក៏ពិចារណាបណ្តាក់ទុនវិនិយោគ ក្នុងវិស័យផ្សេងទៀត ដូចជាការកែច្នៃកសិផល ពិសេសស្រូវ និងការកែច្នៃជ័រកៅស៊ូសម្រាប់ផ្គត់ផ្គង់ដល់ឧស្សាហកម្មក្នុងស្រុក។
ជាការឆ្លើយតប លោក លីវ យ៉ុង បានបង្ហាញចំណាប់អារម្មណ៍ក្នុងការសិក្សា និងស្វែងរកអ្នកផ្គត់ផ្គង់ស្វាយចន្ទីដែលមានស្រាប់ ដើម្បីធ្វើការនាំចេញស្វាយចន្ទី។ កន្លងមកលោកបានធ្វើការស្វែងរកអ្នកផ្គត់ផ្គង់ស្វាយចន្ទី ប៉ុន្តែលោកមិនស្គាល់ពីប្រភព និងបណ្តាញច្បាស់លាស់ ហើយឆ្លៀតក្នុងឱកាសនេះ និងតាមរយៈជំនួបលើកនេះ លោកសង្ឃឹមថាភាគីគណៈកម្មាធិការវិនិយោគកម្ពុជា ពិសេសលោកអគ្គលេខាធិការ ជា វុទ្ធី ផ្ទាល់តែម្តង នឹងចង្អុលបង្ហាញពីប្រភពច្បាស់លាស់ ដើម្បីបង្កើននូវទំនុកចិត្តរបស់លោកបន្ថែមទៀត។
ក្នុងឱកាសនៃជំនួបនេះផងដែរ គណៈប្រតិភូដទៃទៀតក៏បានធ្វើការណែនាំពីសាវតាររបស់ក្រុមហ៊ុននីមួយៗ និងបានបង្ហាញចំណាប់អារម្មណ៍ចំពោះការមកបណ្តាក់ទុនវិនិយោគនៅកម្ពុជាជាខ្លាំង៕