នាយកដ្ឋានប្រឆាំងបទល្មើសបច្ចេកវិទ្យា៖ ពលរដ្ឋគ្រប់រូបត្រូវប្រយ័ត្នចំពោះក្រុមហ៊ុនកម្ចីអនឡាញខុសច្បាប់
ការខ្ចីប្រាក់តាមរយៈកម្ចីអនឡាញខុសច្បាប់ ឬកម្ចីដែលគ្មានប្រភពច្បាស់លាស់ គឺងាយនឹងរងគ្រោះដោយជាប់បំណុលវណ្ឌក និងមិនងាយដោះបំណុលរួចបានឡើយ។
នាយកដ្ឋានប្រឆាំងបទល្មើសបច្ចេកវិទ្យាកម្ពុជា បានសង្កេតឃើញថា បច្ចុប្បន្ននេះមានជនរងគ្រោះជាច្រើនបានចាញ់បោកបទល្មើសឆបោកប្រាក់កម្ចីតាមអនឡាញ ដោយជនអនាមិកបានបង្កើតគណនីហ្វេសប៊ុកឬតេឡេក្រាម ដោយមានដាក់ភ្ជាប់ឈ្មោះជាក្រុមហ៊ុនផ្សេងៗ ហើយបានបង្ហោះផ្សព្វផ្សាយ ផ្តល់ប្រាក់កម្ចីក្រោមលក្ខខណ្ឌផ្តល់កម្ចីងាយស្រួល ដើម្បីឱ្យជនរងគ្រោះមានចំណាប់អារម្មណ៍ខ្ចី។
នៅពេលដែលជនរងគ្រោះទាក់ទងទៅដើម្បីស្នើសុំខ្ចីប្រាក់ និងបាននិយាយត្រូវគ្នា និងយល់ព្រមតាមតម្លៃស្នើប្រាក់កម្ចីរួច ជនអនាមិកក៏បានឱ្យជនរងគ្រោះថតផ្ញើឯកសារមួយចំនួន មានដូចជាអត្តសញ្ញាណបណ្ណ សៀវភៅគ្រួសារ សៀវភៅស្នាក់នៅ ថតរូបកាន់អត្តសញ្ញាណបណ្ណ ថតរូបកន្លែងធ្វើការជាដើម។ បន្ទាប់មក ជនអនាមិកក៏បានផ្ញើ QR Code មកឱ្យស្កេន ដើម្បីវេរលុយជាថ្លៃរត់ឯកសារឬថ្លៃរដ្ឋបាលជាដើម។ ក្រោយពីជនរងគ្រោះបានវេរលុយរួច ជនអនាមិកនោះនៅតែបន្តឱ្យវេរលុយរហូត ឬក៏បានផ្តាច់ទំនាក់ទំនង និងបានលុបសារដែលទំនាក់ទំនងជាមួយជនរងគ្រោះទាំងអស់ចោលតែម្តង ដោយជនអនាមិកនោះមិនបានឱ្យប្រាក់កម្ចីនោះទេ ថែមទាំងអាចយកឯកសារដែលជនរងគ្រោះបានផ្ញើឱ្យនោះមកគំរាម យករូបថតមិត្តភក្កិ បងប្អូនរបស់ជនរងគ្រោះនៅក្នុងប្រព័ន្ធសង្គមហ្វេសប៊ុកជាដើម យកទៅបង្ហោះបង្កាច់បង្ខូចឈ្មោះថាជាជនពាក់ព័ន្ឋទៀតផង។
ក្នុងន័យនេះ នាយកដ្ឋានប្រឆាំងបទល្មើសបច្ចេកវិទ្យា បានក្រើនរម្លឹកដល់សាធារណជន ក៏ដូចជាប្រជាពលរដ្ឋទាំងអស់ គប្បីប្រុងប្រយ័ត្នចំពោះក្រុមហ៊ុនផ្តល់ប្រាក់កម្ចីតាមអនឡាញខុសច្បាប់ ដែលបានធ្វើសកម្មភាពដូចខាងលើ និងប្រាប់ពីវិធីមួយចំនួនពីដំណើរការនៃការឆបោក។
នាយកដ្ឋានប្រឆាំងបទល្មើសបច្ចេកវិទ្យាបានបញ្ជាក់ថា វិធីសង្កេតការបន្លំប្រាក់កម្ចីអនឡាញខុសច្បាប់ ក្រុមជនសង្ស័យទាមទារឱ្យបង់ប្រាក់មុន (ក្រុមហ៊ុនប្រាក់កម្ចីស្របច្បាប់មិនទាមទារឱ្យបង់ប្រាក់មុននោះទេ)។ ការអនុម័តប្រាក់កម្ចីក្រោមលក្ខខណ្ឌងាយស្រួល (គ្មានស្ថាប័នណាដែលអាចផ្តល់ប្រាក់កម្ចីដោយគ្មានការត្រួតពិនិត្យប្រវត្តិហិរញ្ញវត្ថុទេ)។ គ្មានអាសយដ្ឋានជាក់ស្តែង «ពិនិត្យអាសយដ្ឋាននិងគេហទំព័ររបស់ក្រុមហ៊ុនប្រាក់កម្ចីអនឡាញមុននឹងខ្ចីប្រាក់»។ សំណើឱ្យបង់ប្រាក់តាមវិធីមិនធម្មតា «ការបង់ប្រាក់តាម QR Code គឺជាសញ្ញាសង្ស័យ»។
ដើម្បីការពារខ្លួនពីការក្លែងបន្លំ នាយកដ្ឋានប្រឆាំងបទល្មើសបច្ចេកវិទ្យា ស្នើឱ្យពលរដ្ឋពិនិត្យលើក្រុមហ៊ុន ស្វែងរកព័ត៌មានអំពីក្រុមហ៊ុនប្រាក់កម្ចីអនឡាញនោះតាមរយៈអាជ្ញាធរហិរញ្ញវត្ថុ។ “មិនបង់ប្រាក់មុន” ក្រុមហ៊ុនប្រាក់កម្ចីស្របច្បាប់នឹងមិនទាមទារឱ្យបង់ប្រាក់មុននោះទេ។ អានមតិអ្នកប្រើប្រាស់ ស្វែងរកមតិពីអតិថិជនអំពីប្រាក់កម្ចីអនឡាញ។ ប្រើប្រាស់ធនាគារដែលមានការទទួលស្គាល់ ដើម្បីទទួលបានប្រាក់កម្ចីដែលមានសុវត្ថិភាព។
នាយកដ្ឋានប្រឆាំងបទល្មើសបច្ចេកវិទ្យាក៏ស្នើដល់ពលរដ្ឋ មុនធ្វើការស្នើសុំប្រាក់កម្ចី ត្រូវពិនិត្យមើលបន្ថែមតាមរយ:តំណភ្ជាប់ផ្លូវការរបស់ធនាគារជាតិនៃកម្ពុជា https://www.nbc.gov.kh/supervision/commercial_banks.php អំពីក្រុមហ៊ុនផ្តល់ប្រាក់កម្ចីដែលមានការទទួលស្គាល់ពីធនាគារជាតិ៕