រដ្ឋមន្ត្រីមហាផ្ទៃ ស សុខា៖ មន្ត្រីល្មើសវិន័យនឹងត្រូវបញ្ជូនទៅធ្វើការនៅព្រំដែនចាប់ពី ៣ ទៅ ៦ ខែ
លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានធ្វើការណែនាំឱ្យបញ្ជូនមន្ត្រីនគរបាលដែលប្រព្រឹត្តល្មើសវិន័យ ទៅធ្វើការនៅព្រំដែនចាប់ពី ៣ ខែទៅ ៦ ខែ ដើម្បីកែខ្លួន។ នេះបើយោងតាមលោក រ៉េន រតនៈ អ្នកនាំពាក្យក្រសួងមហាផ្ទៃ ដែលបានសរសេរលើទំព័រហ្វេសប៊ុកនាថ្ងៃទី១៧ ខែមីនា ឆ្នាំ២០២៥។
លោក រ៉េន រតនៈ បានឱ្យដឹងថា ការណែនាំនេះគឺបន្ទាប់ពីឃើញមន្ត្រីនគរបាលមួយចំនួនបង្ករឿងល្មើសវិន័យ ហើយការបញ្ជូនទៅព្រំដែននេះអាចត្រូវបន្ថែមលើការបន្ថយស័ក្កិរបស់មន្ត្រីល្មើសទាំងនោះផងដែរ។
លោកបានដកស្រង់សម្តីរបស់លោក ស សុខា ថា៖ “អង្គភាពជំនាញនឹងសម្រេចបញ្ជូនជំនួសឱ្យការបន្ថយស័ក្ដិ ករណីខ្លះបន្ថយទាំងស័ក្ដិនិងថែមទាំងបញ្ជូនទៅព្រំដែន។ បានធ្វើការស្រួលនៅតាមអង្គភាព មិនខិតខំធ្វើឱ្យល្អទេ បែរជាទៅបង្ករឿងល្មើសវិន័យ។ ដូច្នេះមានតែឱ្យទៅព្រំដែន ដើម្បីដឹងថាកងកម្លាំងនៅទីនោះគាត់លំបាកកម្រិតណា មកវិញកែប្រែខ្លួន ហើយខិតខំធ្វើការឱ្យបានល្អ”។
ក្នុងរាជរដ្ឋាភិបាលអាណ្តិតទី ៧ នេះ រាជរដ្ឋាភិបាលបានចាត់វិធានាការជាបន្តបន្ទាប់លើមន្ត្រីដែលល្មើសវិន័យ ក្នុងនោះមានការដកបញ្ឈរជើង ដកចេញពីតំណែង និង បន្ថយស័ក្កិជាដើម។ ជាក់ស្តែងកាលពីដើមខែមីនា ឆ្នាំ២០២៥ នេះ ក្រសួងមហាផ្ទៃបានសម្រេចដកដំណែងអធិការស្រុកស្វាយទាប ខេត្តស្វាយរៀង លោក សោម សារ៉ន ចេញពីតួនាទី ព្រមទាំងបន្ថយឋានន្តរស័ក្កិចំនួន ២ ថ្នាក់ ពាក់ព័ន្ធនឹងការប្រព្រឹត្តអំពើពុករលួយ ខណៈមន្ត្រីពាក់ព័ន្ធ ៣ នាក់ផ្សេងទៀតត្រូវបានដាក់ទណ្ឌកម្មវិន័យកម្រិត១ និងព្រមានតាមរូបភាពជាលាយលក្ខណ៍អក្សរជាលើកទី១៕