កម្ពុជាមានប្រជាជនសរុបជាង ១៧ លាននាក់ក្នុងឆ្នាំ២០២៤ ខណៈភ្នំពេញមានចំនួនប្រជាជនច្រើនជាងគេ
ព្រះរាជាណាចក្រកម្ពុជាមានប្រជាជនសរុបចំនួន ១៧ ២៨០ ៥៤៣ នាក់ក្នុងឆ្នាំ២០២៤ កើនឡើង ១ ៧២៨ ៣៣២ ពី ១៥ ៥៥២ ២១១ ក្នុងឆ្នាំ២០១៩ ដែលត្រូវជា ១១,១%។ នេះបើយោងតាមរបាយការណ៍លទ្ធផលចុងក្រោយនៃអង្កេតចន្លោះជំរឿន ដែលរៀបចំដោយវិទ្យាស្ថានជាតិស្ថិតិនិងក្រសួងផែនការ។
របាយការណ៍បានបង្ហាញទៀតថា ចំនួនប្រជាជនជាបុរសមាន ៨ ៤៩០ ៤១៩ នាក់ ស្មើនឹង ៤៩,១% ខណៈចំនួនប្រជាជនជាស្ត្រីមាន ៨ ៧៩០ ១២៥ នាក់ ស្មើនឹង ៥០,៩% នៃចំនួនប្រជាជនសរុប។
លទ្ធផលអង្កេតចុងក្រោយបានបង្ហាញថា ក្នុងចំណោមរាជធានី-ខេត្តទាំង ២៥ រាជធានីភ្នំពេញមានប្រជាជនខ្ពស់បំផុតដែលមានចំនួន ២ ៣៥២ ៨៥១ នាក់ (១៣,៦%) ខេត្តកណ្តាល ១ ៣៥២ ១៩៨ នាក់ (៧,៨%) ខេត្តព្រៃវែង ១ ២៧៧ ៨៦៧ នាក់ (៧,៤%) ខេត្តបាត់ដំបង ១ ១៣២ ០១៧ នាក់ (៦,៦%) ខេត្តសៀមរាប ១ ០៩៩ ៨២៥ នាក់ (៦,៤%) ខេត្តតាកែវ ១ ០៩៧ ២៤៣ នាក់ (៦,៣%) ខេត្តកំពង់ចាម ១ ០៦២ ៩១៤ នាក់ (៦,២%) ខេត្តកំពង់ស្ពឺ ៩២៤ ១៧៥ នាក់ (៥,៣%) ខេត្តបន្ទាយមានជ័យ ៨៩៨ ៤៨៤ នាក់ (៥,២%) ខេត្តត្បូងឃ្មុំ ៨៨៩ ៩៧០ នាក់ (៥,២%) ខេត្តកំពង់ធំ ៨០៧ ២៥៤ នាក់ (៤,៧%) ខេត្តកំពត ៦៨២ ៩៨៧ នាក់ (៤,០%) ខេត្តស្វាយរៀង ៦១៣ ១៥៩ នាក់ (៣,៥%) ខេត្តកំពង់ឆ្នាំង ៦០៤ ៨៩៥ នាក់ (៣,៥%) ខេត្តពោធិ៍សាត់ ៥១៦ ០៧២ នាក់ (៣,០%) ខេត្តក្រចេះ ៤៤១ ០៧៨ នាក់ (២,៦%) ខេត្តឧត្តរមានជ័យ ២៦៧ ៧០៣ នាក់ (១,៥%) ខេត្តព្រះវិហារ ២៤៩ ៩៧៣ នាក់ (១,៤%) ខេត្តរតនគិរី ២៣៥ ៨៥២ នាក់ (១,៤%) ខេត្តព្រះសីហនុ ២៣៤ ៧០២ នាក់ (១,៤%) ខេត្តស្ទឹងត្រែង ១៧៦ ៤៨៨ នាក់ (១,០%) ខេត្តកោះកុង ១៤០ ៩៦២ នាក់ (០,៨%) ខេត្តមណ្ឌលគិរី ៩៧ ៨៥៧ នាក់ (០,៦%) ខេត្តប៉ៃលិន ៧៩ ៤៤៥ នាក់ (០,៥%) និង ខេត្តកែប ៤៨ ៧៧២ នាក់ (០,៣%)៕