ព្រឹទ្ធសភាជំរុញធនាគារជាតិនៃកម្ពុជា ពិនិត្យករណីធនាគារកាត់សេវាពីគណនី ដែលគ្មានប្រតិបត្តិការ
អនុប្រធានទី ២ ព្រឹទ្ធសភាកម្ពុជា លោក ធន់ វឌ្ឍនា បានជំរុញឱ្យធនាគារជាតិនៃកម្ពុជា ធ្វើការពិនិត្យចំពោះការកាត់ថ្លៃសេវាពីគណនីដែលគ្មានប្រតិបត្តិការរបស់អតិថិជន ដែលបញ្ហានេះគឺជាចម្ងល់របស់ប្រជាពលរដ្ឋនៅតាមមូលដ្ឋាននានា។
លោក ធន់ វឌ្ឍនា បានលើកពីបញ្ហានេះនៅក្នុងពិធីបិទសិក្ខាសាលាស្ដីពីប្រាក់រៀល និងអបអរខួប ៤៥ ឆ្នាំនៃការដាក់ចរាចរណ៍ប្រាក់រៀលឡើងវិញ នៅសភាជាតិកម្ពុជាកាលពីពេលថ្មីៗនេះ។ លោកបានលើកឡើងថា ការកាត់លុយចេញពីគណនីដែលពលរដ្ឋទុកលុយក្នុងនោះ ជារឿងមួយមិនសមរម្យ។
លោកបានចោទជាសំណួរថា ខាងធនាគារថាដោយសារតែគណនីហ្នឹងអត់ប្រើ ដូច្នេះត្រូវគិតសេវា។ ចុះបើសិនជាអតិថិជនទៅដកលុយរាល់ថ្ងៃ ដកដាក់ៗ តើបុគ្គលិក (ធនាគារ) រវល់ឬអត់ទេ? បើខាងធនាគាររវល់ វាគួរតែគិតសេវា តែអតិថិជនយកលុយទៅដាក់ចោល រឿងអីខាងធនាគារត្រូវគិតសេវាដែរ? ហេតុអ្វីពេលអតិថិជនទៅដកលុយដាក់លុយ ដែលត្រូវរវល់ដល់បុគ្គលិក ខាតទាំងម៉ាស៊ីនត្រជាក់ធនាគារ ខាងធនាគារមិនគិតសេវា តែពេលលុយនៅស្ងៀម ខាងធនាគារបែរជាគិតសេវាទៅវិញ? ដោយការកាត់សេវាប្រចាំឆ្នាំលើគណនីដែលពុំមានប្រតិបត្តិការក្នុងតម្លៃប្រមាណ ៥ ដុល្លារអាម៉េរិកក្នុងមួយឆ្នាំ។
លោក ធន់ វឌ្ឍនា បានជំរុញដល់ធនាគារជាតិនៃកម្ពុជា គួរចេញប្រកាសមួយលើករណីនេះ ជាមួយនឹងការពិនិត្យដល់គណនីធនាគារដែលម្ចាស់ទទួលមរណភាពផងដែរ ដើម្បីជៀសវាងមានរឿងមិនប្រក្រតីណាមួយកើតឡើង៕