ពិធីបុណ្យទន្លេលើកទី៩ នៅខេត្តតាកែវ បានប្រារព្ធឡើងជាផ្លូវការក្រោមអធិបតីភាពនាយករដ្ឋមន្ត្រីកម្ពុជា ហ៊ុន ម៉ាណែត
ពិធីបុណ្យទន្លេលើកទី ៩ ក្រោមប្រធានបទ “គុណតម្លៃនៃទន្លេ៖ ផ្សារភ្ជាប់វប្បធម៌និងទេសចរណ៍ធម្មជាតិ” បានប្រារព្ធឡើងជាផ្លូវការនៅខេត្តតាកែវ នាថ្ងៃទី២២ ខែមីនា ឆ្នាំ២០២៥ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
ពិធីបុណ្យទន្លេធ្វើឡើងដើម្បីបំផុសចលនាមហាជន ឱ្យចូលរួមក្នុងការអភិរក្សនិងអភិវឌ្ឍធនធានទន្លេប្រកបដោយនិរន្តរភាព និងចូលរួមសម្រេចយុទ្ធសាស្រ្តពិពិធកម្មទេសចរណ៍ឱ្យកាន់តែសម្បូរបែប។
គោលបំណងធំចំនួន ៣ សម្រាប់ព្រឹត្តិការណ៍បុណ្យទន្លេឆ្នាំ២០២៥ នេះរួមមាន (១) ជំរុញ លើកតម្លៃ និង ផ្សព្វផ្សាយសក្តានុពលទេសចរណ៍ខេត្តតាមដងទន្លេ។ (២) ចូលរួមគាំទ្រគោលនយោបាយរបស់ រាជរដ្ឋាភិបាល ក្នុងការយកចិត្តទុកដាក់អភិវឌ្ឍតំបន់តាមដងទន្លេ និងចូលរួមសម្រេចយុទ្ធសាស្រ្តពិពិធកម្មទេសចរណ៍ តាមរយៈការបង្កើតព្រឹត្តិការណ៍ទេសចរណ៍ថ្មីៗ សម្រាប់ខេត្តតាមដងទន្លេ។ (៣) បំផុសចលនាមហាជននិងគ្រប់ភាគីពាក់ព័ន្ធ ឱ្យចូលរួមក្នុងការងារអភិរក្សនិងអភិវឌ្ឍធនធានទន្លេ ប្រកបដោយនិរន្តរភាពនិងការទទួលខុសត្រូវ ព្រមទាំងលើកទឹកចិត្តដល់ប្រជាពលរដ្ឋ ឱ្យចូលរួមក្នុងសកម្មភាពនៃការបង្កើនសោភណភាព អនាម័យបរិស្ថានទីក្រុងនិងសហគមន៍ សំដៅទាក់ទាញកំណើនភ្ញៀវទេសចរជាតិនិងអន្តរជាតិបន្ថែមទៀត។
ថ្លែងក្នុងពិធីបើកបុណ្យទន្លេលើកទី ៩ សម្តេចធិបតី ហ៊ុន ម៉ាណែត បានជំរុញឱ្យខេត្ត-ក្រុងនិងតំបន់ទេសចរណ៍នីមួយៗពង្រឹងគុណភាពទេសចរណ៍ឱ្យបានល្អ ប្រើប្រាស់ឱ្យអស់លទ្ធភាពនូវសក្តានុពលទេសចរណ៍ដែលមាននៅក្នុងមូលដ្ឋានរបស់ខ្លួន និងដាក់គោលដៅទេសចរណ៍ចាប់ពីទេសចរក្នុងស្រុកជាមុន មុននឹងសំដៅលើទេសចរអន្តរជាតិ ដើម្បីទាក់ទាញភ្ញៀវទេសចរណ៍ឱ្យបានកាន់តែច្រើន៕