ស្ពានអាកាស មរតកតេជោ នឹងបើកសម្ពោធដាក់ឱ្យប្រើប្រាស់ជាផ្លូវការនៅថ្ងៃទី៧ ខែមេសា ឆ្នាំ២០២៥
ស្ពានអាកាស មរតកតេជោ ដែលស្ថិតនៅទីប្រសព្វរវាងមហាវិថីព្រះមុនីវង្ស មហាវិថីសម្តេចតេជោ ហ៊ុន សែន (ផ្លូវ ៦០ ម៉ែត្រ) និង មហាវិថីយោធពលខេមរភូមិន្ទ (ផ្លូវលេខ ២៧១) ក្នុងទឹកដីខណ្ឌមានជ័យ និងខណ្ឌចំការមន នឹងបើកសម្ពោធដាក់ឱ្យប្រើប្រាស់ជាផ្លូវការនៅថ្ងៃទី៧ ខែមេសា ឆ្នាំ២០២៥ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត និងលោកស្រីបណ្ឌិត ពេជ ចន្ទមុន្នី។ នេះបើយោងតាមលោកស្រី ដោ សម្ផស្ស នាយិការរងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ។
ស្ពានអាកាស មរតកតេជោ នឹងជួយកាត់បន្ថយការខាតបង់ពេលវេលាក្នុងការធ្វើដំណើរ សន្សំសំចៃ សម្រួលលំហូរចរាចរណ៍ ធ្វើឱ្យប្រជាពលរដ្ឋងាយស្រួលធ្វើដំណើរ ជាពិសេសពេលរដូវបុណ្យទានម្តងៗ ដូចជា ក្នុងអំឡុងពេលពិធីបុណ្យចូលឆ្នាំខ្មែរប្រពៃណីជាតិ និងព្រះរាជពិធីបុណ្យអុំទូកជាដើម។
ស្ពានអាកាស មរតកតេជោ ត្រូវបានបើកការដ្ឋានសាងសង់កាលពីព្រឹកថ្ងៃទី៣១ ខែសីហា ឆ្នាំ២០២២ ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីកម្ពុជា។ ស្ពានអាកាសនេះសាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ដោយចំណាយថវិកា ជាង ៣៦ លានដុល្លារអាម៉េរិក និងចំណាយពេលវេលាសាងសង់ ៣៦ ខែ៕