កម្ពុជាគ្រោងវិនិយោគទឹកប្រាក់ជិត ១ ប៊ីលានដុល្លារ អភិវឌ្ឍចំណតកំពង់ផែខេត្តព្រះសីហនុ
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានឱ្យដឹងថា កម្ពុជាគ្រោងវិនិយោគនូវទំហំទឹកប្រាក់ជិត ១ ប៊ីលានដុល្លារអាម៉េរិក សម្រាប់អភិវឌ្ឍចំណតកំពង់ផែខេត្តព្រះសីហនុ ដើម្បីប្រែក្លាយខេត្តនេះទៅជាតំបន់សេដ្ឋកិច្ចពិសេសគំរូពហុបំណងនាពេលដ៏ខ្លីខាងមុខនេះ។
នៅក្នុងពិធីសម្ពោធដាក់ឱ្យប្រើប្រាស់អគារសិក្សា នៅវិទ្យាល័យ ហ៊ុន សែន វាលរេញ នាព្រឹកថ្ងៃទី២៦ ខែមីនា ឆ្នាំ២០២៥ សម្ដេចធិបតី ហ៊ុន ម៉ាណែត មានប្រសាសន៍ថា ព្រះសីហនុជាខេត្តនាំមុខនៃកំពង់ផែទឹកជ្រៅ ខណៈកម្ពុជាបានកំណត់ជាគោលដៅផែអាទិភាពធំ។ ខេត្តផ្សេងទៀតក៏យើងត្រូវតែអភិវឌ្ឍដែរ រួមមានខេត្តកោះកុងនិងខេត្តកំពត ប៉ុន្តែសម្រាប់សក្ដានុពលនិងការវិនិយោគពីពេលនេះទៅដល់ឆ្នាំ២០២៩ យើងគ្រោងវិនិយោគនូវទំហំទឹកប្រាក់ជិត ១ ប៊ីលានដុល្លារបន្ថែម ខណៈជំហានទី ១ ចាយជាង ២០០ លានដុល្លារ ដែលជាឥណទានជប៉ុន។ នៅសល់ ២ ដំណាក់ទៀតជាមួយទំហំទឹកប្រាក់ជាង ៦០០ លានដុល្លារ ដែលកម្ពុជាវិនិយោគធំណាស់នៅក្នុងខេត្តព្រះសីហនុ មិនត្រឹមតែជាកំពង់ផែទេ តែរៀបចំជាតំបន់ភស្តុភាកម្មនៃប្រព័ន្ធឡូជីស្ទិកតំបន់។
គម្រោងកំពង់ផែសាងសង់ទាំង ៣ ជំហាន នឹងប្រើប្រាស់ថវិកាសរុបប្រមាណ ៩៧៣ លានដុល្លារ ក្នុងនោះឥណទានសម្បទានពីរាជរដ្ឋាភិបាលជប៉ុនមានចំនួនប្រមាណ ៧៦០ លានដុល្លារ ថវិកាបដិភាគរបស់រាជរដ្ឋាភិបាលកម្ពុជាសម្រាប់ពន្ធអាករផ្សេងៗចំនួនប្រមាណ ១៩២ លានដុល្លារ និងថវិកាផ្ទាល់របស់កំពង់ផែស្វយ័តក្រុងព្រះសីហនុចំនួនប្រមាណ ២១ លានដុល្លារ។
ការសាងសង់ចំណតកំពង់ផែថ្មីដែលចំណាយថវិការហូតដល់ទៅជិត ១ ប៊ីលានដុល្លារនេះ គឺដើម្បីពង្រីកសមត្ថភាពដឹកជញ្ជូនទំនិញតាមផ្លូវសមុទ្រឱ្យកាន់តែខ្លាំងក្លាថែមទៀត ឆ្លើយតបនឹងកំណើនសេដ្ឋកិច្ចនិងពាណិជ្ជកម្មរបស់កម្ពុជា។ គម្រោងនេះនឹងប្រែក្លាយកំពង់ផែស្វយ័តក្រុងព្រះសីហនុ ដែលបច្ចុប្បន្នជាកំពង់ផែអន្តរជាតិខ្នាតតូច ឱ្យទៅជាកំពង់ផែអន្តរជាតិខ្នាតធំ ដែលអនុញ្ញាតឱ្យនាវាកុងតឺន័រធុនធំមកពីគ្រប់តំបន់នៅក្នុងពិភពលោកអាចចូលចតបាន ដោយពុំមានឧបសគ្គលើជម្រៅទឹកទៀតឡើយ។ គម្រោងទាំងនេះនឹងផ្តល់ផលចំណេញសេដ្ឋកិច្ចប្រមាណ ២៣.៣% និងផលប្រយោជន៍ហិរញ្ញវត្ថុប្រមាណ ៧.៧% ផងដែរ។
ចំពោះចំណតផែកុងតឺន័រជំហានទី ១ នៅពេលដាក់ឱ្យដំណើរការ នឹងអនុញ្ញាតឱ្យនាវាប្រមាណ ៩៣% ក្នុងតំបន់ចូលចតនៅកំពង់ផែស្វយ័តក្រុងព្រះសីហនុ ដែលបច្ចុប្បន្នមានត្រឹមតែ ១៨% ប៉ុណ្ណោះអាចចូលចតបាន ហើយតម្លៃដឹកជញ្ជូនតាមសមុទ្រនឹងមានតម្លៃប្រហាក់ប្រហែលជាមួយបណ្តាប្រទេសក្នុងតំបន់ផងដែរ។
រីឯចំណតផែកុងតឺន័រទឹកជ្រៅជំហានទី ២ និងទី ៣ នឹងផ្តល់លទ្ធភាពបន្ថែមសម្រាប់ការនាំទំនិញចេញ-ចូលដោយផ្ទាល់ ពីកម្ពុជាទៅកាន់បណ្តាកំពង់ផែក្នុងតំបន់អឺរ៉ុបនិងសហរដ្ឋអាម៉េរិក ដោយពុំចាំបាច់ឆ្លងកាត់បណ្តាកំពង់ផែផ្សេងៗនៅក្នុងតំបន់ទៀតឡើយ៕