អគារជាប់គាំង ១២៣ គម្រោងក្នុងខេត្តព្រះសីហនុបន្តដំណើរការឡើងវិញ
គម្រោងវិនិយោគចំនួន ២៨៨ គម្រោងទទួលបានការលើកទឹកចិត្តពិសេសពីរាជរដ្ឋាភិបាល។ ក្នុងនោះ គិតត្រឹមខែមីនា ឆ្នាំ២០២៥ មានអគារជាប់គាំងចំនួន ១២៣ គម្រោងនឹងបន្តការសាងសង់ឡើងវិញ ដែលគិតជាថវិកា ៦,៧ ប៊ីលានដុល្លារអាម៉េរិក។
នៅថ្ងៃទី២៦ ខែមីនា ឆ្នាំ២០២៥ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានមានប្រសាសន៍ថា មកដល់ពេលនេះ ខេត្តព្រះសីហនុមាន ២៨៨ គម្រោងដែលបានដាក់លើកទឹកចិត្ត ២៦៩ គម្រោងបានផ្ដល់គោលការណ៍ដើម្បីដោះស្រាយ ក្នុងនោះមាន ១២៣ គម្រោងត្រូវបានរំដោះ គិតជាថវិកា ៦,៧ ប៊ីលានដុល្លារ។
សម្ដេចធិបតី ហ៊ុន ម៉ាណែត បានបញ្ជាក់ថា កម្មវិធីពិសេសជំរុញការវិនិយោគក្នុងខេត្តព្រះសីហនុ នឹងបន្តរហូតដល់ដំណាច់ឆ្នាំ២០២៥ ខណៈរាជរដ្ឋាភិបាលទើបតែបានអនុម័តផែនការមេអភិវឌ្ឍតំបន់សមុទ្រ ដោយយកខេត្តព្រះសីហនុជាគោល។
កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤ ត្រូវបានប្រកាសដាក់ឱ្យអនុវត្តកាលពីថ្ងៃទី៣១ ខែមករា ឆ្នាំ២០២៤ ក្រោមអធិបតីភាពនាយករដ្ឋមន្ត្រីកម្ពុជា។ យោងតាមរបាយការណ៍របស់រាជរដ្ឋាភិបាល ករណីអគារជាប់គាំងនៅក្នុងខេត្តព្រះសីហនុ មានអគារផ្អាកដំណើរការសាងសង់ចំនួន ៣៦២ អគារ ដែលត្រូវការទុនវិនិយោគបន្ថែមប្រមាណ ១,១៦ ប៊ីលានដុល្លារដើម្បីបញ្ចប់ការសាងសង់ និងអគារសាងសង់រួចប៉ុន្តែមិនដំណើរការមានចំនួន ១៧៦ អគារ៕