កម្ពុជា-អាម៉េរិកបើកកិច្ចសន្ទនារវាងរដ្ឋ និងវិស័យឯកជនលើកទី២
កិច្ចសន្ទនាលើកទី ២ រវាងរដ្ឋនិងវិស័យឯកជនកម្ពុជា-សហរដ្ឋអាម៉េរិក បានធ្វើឡើងកាលពីថ្ងៃទី២៦ ខែមីនា ឆ្នាំ២០២៥ ក្រោមអធិបតីភាពលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី ១ ក្រុមប្រឹក្សាអភិវឌ្ឍន៍កម្ពុជា និងលោកស្រី Bridgette L. Walker ភារធារីស្ថានទូតអាម៉េរិកប្រចាំកម្ពុជា។
តំណាងក្រសួង ស្ថាប័នពាក់ព័ន្ធ ប្រធានសភាពាណិជ្ជកម្មអាម៉េរិកនៅកម្ពុជា ក្រុមប្រឹក្សាធុរកិច្ចអាម៉េរិក-អាស៊ាន វិស័យឯកជន និង មន្ត្រីជំនាញជាច្រើនរូបបានចូលរួមក្នុងកិច្ចសន្ទនានេះ។
កិច្ចសន្ទនារដ្ឋនិងវិស័យឯកជនកម្ពុជា-អាម៉េរិកលើកទី ២ នេះ បានលើកយកប្រធានបទជាអាទិភាពមកពិភាក្សា ជុំវិញបរិយាកាសវិនិយោគនិងការធ្វើធុរកិច្ចនៅកម្ពុជា រួមមាន៖ ១. បទប្បញ្ញត្តិនិងបទដ្ឋានគតិយុត្តពាក់ព័ន្ធ។ ២. កត្តាជំរុញលើកកម្ពស់លទ្ធភាពក្នុងការចូលមកកាន់ទីផ្សារកម្ពុជា ពីសំណាក់ការវិនិយោគនិងធុរកិច្ចពីសហរដ្ឋអាម៉េរិក។ ៣. នីតិវិធីពាក់ព័ន្ធនិងកិច្ចសម្របសម្រួលវិនិយោគនានា និង បញ្ហាផ្សេងៗ។
លោក ស៊ុន ចាន់ថុល បានបង្ហាញអំពីកំណើននៃគម្រោងវិនិយោគដែលគួរឱ្យកត់សម្គាល់ ពិសេសគឺការបំបែកកំណត់ត្រារបស់ក្រុមប្រឹក្សាអភិវឌ្ឍន៍កម្ពុជា ដែលសម្រេចបាននូវការអនុម័តគម្រោងចំនួន ៤១៤ ក្នុងឆ្នាំ២០២៤ ដែលនេះជាសក្ខីភាពស្តែងឱ្យឃើញពីប្រសិទ្ធភាពនៃច្បាប់ស្តីពីវិនិយោគនៃព្រះរាជាណាចក្រកម្ពុជា ក៏ដូចជាគោលនយោបាយនានារបស់រាជរដ្ឋាភិបាល ក្នុងការថែទាំគាំទ្រកិច្ចការវិនិយោគពីវិស័យឯកជន ដោយបានចាត់ទុកវិស័យឯកជនជាម៉ាស៊ីនដ៏សំខាន់ ក្នុងការជំរុញកំណើនសេដ្ឋកិច្ចជាតិ។
លោកក៏បានលើកឡើងអំពីការអនុវត្តឌីជីថលូបនីយកម្មនៅក្រុមប្រឹក្សាអភិវឌ្ឍន៍កម្ពុជា តាមរយៈការដាក់ឱ្យប្រើប្រាស់ប្រព័ន្ធគ្រប់គ្រងគម្រោងវិនិយោគកម្ពុជា cdcIPM និងបានរំលេចអំពីមុខងារ e-Signature របស់ប្រព័ន្ធដែលផ្តល់ភាពបត់បែនខ្ពស់ ក្នុងការអនុម័តគម្រោងវិនិយោគមានលក្ខណៈសម្បត្តិគ្រប់គ្រាន់បានពីគ្រប់ទីកន្លែងនិងពេលវេលា តាមរយៈប្រព័ន្ធអ៊ីនធឺណិត។
តំណាងវិនិយោគិនអាម៉េរិកបានបង្ហាញនូវចំណាប់អារម្មណ៍ជាវិជ្ជមាន ដែលទទួលបានការយកចិត្តទុកដាក់ពីរាជរដ្ឋាភិបាលកម្ពុជា និងមានសុទិដ្ឋិនិយមខ្ពស់ចំពោះការទទួលស្តាប់ពីបញ្ហាប្រឈម និងការផ្លាស់ប្តូរយោបល់ ពិសេសជាមួយនឹងបទពិសោធន៍ដែលធ្លាប់ទទួលបានការឆ្លើយតប ក៏ដូចជាដំណោះស្រាយ។
កិច្ចសន្ទនារវាងរដ្ឋនិងវិស័យឯកជនកម្ពុជា-អាម៉េរិក ត្រូវបានរៀបចំឡើងដើម្បីស្ដាប់និងពិភាក្សា ដោះស្រាយរាល់កង្វល់នានារបស់វិនិយោគិនអាម៉េរិក ដោយអនុវត្តក្រោមស្មារតីសហការនិងឯកភាពរួមគ្នារវាងប្រមុខថ្នាក់ដឹកនាំ ក្រោមការចង្អុលបង្ហាញរបស់នាយករដ្ឋមន្ត្រីកម្ពុជា និងថ្នាក់ដឹកនាំសហរដ្ឋអាម៉េរិក៕