ទេសាភិបាលធនាគារជាតិ ជា សិរី ធ្វើជាវាគ្មិនក្នុងកិច្ចពិភាក្សានៃវេទិកា ប៉អាវ សម្រាប់អាស៊ីនៅប្រទេសចិន
លោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា បានចូលរួមធ្វើជាវាគ្មិនកិត្តិយសក្នុងកិច្ចពិភាក្សាក្រោមប្រធានបទស្តីពី “កិច្ចសហប្រតិបត្តិការពាណិជ្ជកម្មឆ្លងដែនតាមប្រព័ន្ធអេឡិចត្រូនិក” ក្នុងឱកាសនៃការចូលរួមក្នុងវេទិកា ប៉អាវ សម្រាប់អាស៊ី (Boao Forum for Asia) ប្រចាំឆ្នាំ២០២៥ នាថ្ងៃទី២៧ ខែមីនា ឆ្នាំ២០២៥ ក្នុងខេត្តហៃណាន (Hainan) សាធារណរដ្ឋប្រជាមានិតចិន។
តាមរយៈកិច្ចពិភាក្សានេះ លោកស្រី ជា សិរី បានវាយតម្លៃខ្ពស់ចំពោះការតភ្ជាប់ប្រព័ន្ធទូទាត់រវាងកម្ពុជានិងចិន ព្រមទាំងបានលើកទ្បើងពីតួនាទីចាំបាច់របស់ប្រព័ន្ធទូទាត់ឆ្លងដែននៅក្នុងប្រតិបត្តិការពាណិជ្ជកម្មឆ្លងដែន និងបានរំលេចពីបទពិសោធន៍របស់ធនាគារជាតិនៃកម្ពុជា ក្នុងការខិតខំពង្រីកការទូទាត់ឆ្លងដែនតាមរយៈប្រព័ន្ធបាគង ទៅតាមបណ្តាប្រទេសជាដៃគូពាណិជ្ជកម្មរបស់កម្ពុជា។
លោកស្រីក៏បានផ្តល់នូវទស្សនាទានថ្មីៗបន្ថែមទៀត ក្នុងការជំរុញពាណិជ្ជកម្មតាមប្រព័ន្ធអេទ្បិចត្រូនិក ដែលក្នុងនោះរួមមាន៖ (១) ការគិតគូរនូវគោលនយោបាយគាំទ្រលើកទឹកចិត្តដល់សហគ្រាសធុនតូចនិងមធ្យមក្នុងស្រុក ក្នុងការបង្កើនសមត្ថភាពនិងគុណភាពផលិតផលសម្រាប់ទីផ្សារឆ្លងដែន។ (២) ការរៀបចំឱ្យកាន់តែមានប្រសិទ្ធភាពចំពោះយន្តការទ្បូជីស្ទីក ប្រព័ន្ធពន្ធគយ និង ការស្វែងរកទីផ្សារជាដើម។ (៣) ការពង្រីកប្រព័ន្ធទូទាត់ដោយផ្ទាល់រវាងអ្នកនាំចេញនិងនាំចូលផលិតផលឆ្លងដែន ដើម្បីពន្លឿននិងធ្វើឱ្យកាន់តែមានប្រសិទ្ធភាពក្នុងការទូទាត់។
វេទិកា ប៉អាវ សម្រាប់អាស៊ីប្រចាំឆ្នាំ២០២៥ ប្រារព្ធឡើងចាប់ពីថ្ងៃទី២៥ ដល់ថ្ងៃទី២៨ ខែមីនា ឆ្នាំ២០២៥ នៅខេត្តហៃណាន ប្រទេសចិន៕