បងប្រុសច្បងរបស់សម្ដេចតេជោ ហ៊ុន សែន អ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាពក្នុងជន្មាយុ ៧៨ ឆ្នាំ
បងប្រុសច្បងរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាពនៅវេលាម៉ោង ២ និង ២៧ នាទីរំលងអធ្រាត្រ ដោយរោគាពាធក្នុងជន្មាយុ ៧៨ ឆ្នាំ។
ដំណឹងមរណភាពរបស់លោក ហ៊ុន សាន ត្រូវបានបង្ហាញឱ្យដឹងជាសាធារណៈដោយសម្ដេចតេជោ ហ៊ុន សែន លើទំព័រហ្វេសប៊ុកផ្លូវការ នាវេលារំលងអធ្រាត្រឈានចូលថ្ងៃទី២៨ ខែមីនា ឆ្នាំ២០២៥។
សម្ដេចតេជោបានសរសេរលើទំព័រហ្វេសប៊ុកផ្លូវការថា៖ សង្ខារមិនទៀង តែការស្លាប់គឺទៀង បងប្រុសខ្ញុំបានលាចាកលោកនេះទៅហើយ បើទោះមិនចង់ទទួលក៏ត្រូវតែទទួលយកការពិតនេះដែរ។ បើទោះបីខ្ញុំជាប្អូន តែខ្ញុំជាមេគ្រួសារមួយនេះ។ ខ្ញុំនិងភរិយា រួមជាមួយកូនៗនិងបងប្អូន បានខិតខំអស់លទ្ធភាពដើម្បីព្យាបាលបងទីមួយ។
សពរបស់លោក ហ៊ុន សាន នឹងដង្ហែទៅបញ្ចុះនៅវត្តច័ន្ទបុរីវង្ស ស្ថិតក្នុងភូមិសំរោងជើង សង្កាត់សំរោង ខណ្ឌព្រែកព្នៅ រាជធានីភ្នំពេញ នៅថ្ងៃទី២ ខែមេសា ឆ្នាំ២០២៥ វេលាម៉ោង ៧ និង ១១ នាទីព្រឹក។
លោក ហ៊ុន សាន ត្រូវបានព្រះមហាក្សត្រប្រោសព្រះរាជទានគោរមងារជា «អ្នកឧកញ៉ា ឧត្តមមេត្រីវិសិដ្ឋ» កាលពីថ្ងៃទី១៤ ខែកក្កដា ឆ្នាំ២០២៣៕