កម្ពុជាមិនមានកន្លែងណាមួយកើតមានបញ្ហារញ្ជួយដីដូចនៅប្រទេសថៃ និងមីយ៉ាន់ម៉ានោះទេ
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយកម្ពុជា លោក សុទ្ធ គឹមកុលមុន្នី បានថ្លែងនៅព្រឹកថ្ងៃទី២៩ មីនា ឆ្នាំ២០២៥ នេះថា គិតត្រឹមបច្ចុប្បន្ន កម្ពុជាមិនមានកន្លែងណាមួយដែលកើតមានបញ្ហារញ្ជួយដីដូចនៅប្រទេសថៃ មីយ៉ាន់ម៉ា និង បណ្តាប្រទេសមួយចំនួនទៀតនោះទេ។
លោក សុទ្ធ គឹមកុលមុន្នី បានលើកឡើងថា សម្រាប់ស្ថានភាពគ្រោះរញ្ជួយដីនៅថ្ងៃទី២៨ ខែមីនា ឆ្នាំ ២០២៥ ម្សិលមិញនេះ សម្រាប់កម្ពុជាគឺមិនមានកន្លែងដែលកើតមានបញ្ហារញ្ជួយដីឡើយ។ ចំពោះបុគ្គលិកធនាគារមួយចំនួនធ្វើការនៅតាមអគារខ្ពស់ៗខ្លះ ដោយសារភ័យខ្លាច ទើបបានផ្អើលចុះចេញពីអគារធនាគារ ដើម្បីសុវត្ថិភាពផ្ទាល់ខ្លួន ដោយសារទទួលបានព័ត៌មានថាមានរញ្ជួយដី និងមានអារម្មណ៍ថាមានការរង្គើអគារ ក្រោយករណីរញ្ជួយដីនៅប្រទេសថៃនិងមីយ៉ាន់ម៉ា។ ប៉ុន្តែនៅពេលរសៀលថ្ងៃដដែល បុគ្គលិកក៏បានចូលធ្វើការធម្មតាវិញ ធនាគារខ្លះដល់ម៉ោងចេញក៏ទៅផ្ទះតែម្ដង។
លោកបានបន្ថែមថា ក្រុមការងារជំនាញបានចុះប្រមូលព័ត៌មានបន្ថែម ដើម្បីវាយតម្លៃអំពីស្ថានភាពដែលបានកើតឡើងនិងផលប៉ះពាល់។ ប៉ុន្តែជាក់ស្ដែងអត់មានឃើញសញ្ញារង្គើញ័រនៅរាជធានីភ្នំពេញទេ។ លោកបញ្ជាក់ថា ជារួមសម្រាប់កម្ពុជាអត់ទាន់មានបញ្ហាអ្វីកើតឡើងទេ ហើយមកដល់ពេលល្ងាចដដែល សភាពការណ៍បានវិលមករកជាធម្មតាវិញហើយ។
ចំណែកលោក កត្តា អ៊ន រដ្ឋលេខាធិការនិងជាអ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ ក៏បានឱ្យដឹងនៅព្រឹកថ្ងៃទី២៩ ខែមីនានេះដែរថា គិតត្រឹមម៉ោងនេះ ពុំទាន់មានព័ត៌មានថាមានពលករខ្មែររងគ្រោះដោយគ្រោះរញ្ជួយដីនៅប្រទេសថៃនៅឡើយទេ។ ចំណែកស្ថានទូតកម្ពុជានិងអនុព័ន្ធការងារអមស្ថានទូតកម្ពុជាប្រចាំប្រទេសថៃ កំពុងតាមដាននៅទីកន្លែងកើតហេតុយ៉ាងយកចិត្តទុកដាក់ជាទីបំផុត។
ការរញ្ជួយដីកម្រិត ៧,៧ រ៉ិចទ័រ បានវាយប្រហារចំកណ្តាលប្រទេសមីយ៉ាន់ម៉ា កាលពីថ្ងៃទី២៨ ខែមីនា ឆ្នាំ២០២៥ ដែលបណ្តាលឱ្យមានការបាត់បង់អាយុជីវិតមនុស្សយ៉ាងច្រើន និងការបំផ្លិចបំផ្លាញដ៏សម្បើម។ ក្រៅតែពីមីយ៉ាន់ម៉ា គ្រោះរញ្ជួយដីដ៏ធំមិនធ្លាប់មាននេះ ក៏បណ្តាលឱ្យមានផលប៉ះពាល់នៅក្នុងចំណោមបណ្ដាប្រទេសអាស៊ីអាគ្នេយ៍ជាច្រើនផងដែរ ដូចជា ថៃវៀតណាម ឡាវ និង បង់ក្លាដែស ដោយឡែកក៏មានប្រទេសចិនផងដែរ។ ត្រឹមព្រឹកថ្ងៃសៅរ៍នេះ តួលេខអ្នកស្លាប់បានលោតឡើងដល់ ៦៩៤ នាក់ ស្លាប់ និងរបួស ១ ៦៧០ នាក់ នៅមីយ៉ាន់ម៉ា។ ចំណែកនៅប្រទេសថៃ គិតត្រឹមម៉ោង ៥ ល្ងាច ថ្ងៃទី ២៨ ខែមីនា ឆ្នាំ ២០២៥ សមត្ថកិច្ចថៃបានរកឃើញជនរងគ្រោះក្នុងហេតុការណ៍រញ្ជួយដីនៅទីក្រុងបាងកកប្រទេសថៃចំនួន ៥០ នាក់ ស្លាប់ ៣ នាក់ ហើយប្រតិបត្តិការជួយសង្គ្រោះកំពុងបន្ត៕