តារាចម្រៀងចិន Jay Chou នឹងបង្ហាញវត្តមានក្នុងកម្មវិធីប្រគំតន្ត្រីខ្នាតយក្សនៅកម្ពុជា
ក្រសួងទេសចរណ៍កម្ពុជាបានឱ្យដឹងថា តារាចម្រៀងល្បីឈ្មោះលំដាប់ពិភពលោក លោក Jay Chou នឹងបង្ហាញវត្តមានក្នុងកម្មវិធីប្រគំតន្ត្រីខ្នាតយក្សនៅប្រទេសកម្ពុជា។
ក្រសួងទេសចរណ៍បានឱ្យដឹងនាក្នុងជំនួបសម្តែងការគួរសមនិងពិភាក្សាការងាររវាងលោក ហួត ហាក់ រដ្ឋមន្ត្រីក្រសួងទេសចរណ៍កម្ពុជា ជាមួយលោក អ៊ុន អ៊ុយ (Wen Wei) អគ្គលេខាធិការងសមាគមន៍វប្បធម៌ទេសចរណ៍រដ្ឋធានីប៉េកាំងនៃសាធារណរដ្ឋប្រជាមានិតចិន កាលពីពេលថ្មីៗកន្លងទៅនេះ។
ក្នុងឱកាសនៃជំនួប លោក ហួត ហាក់ និងលោក អ៊ុន អ៊ុយ បានពិភាក្សាទាក់ទងនឹងកិច្ចសហប្រតិបត្តិការជំរុញលើការផ្លាស់ប្តូរបទពិសោធន៍ ក្នុងការអភិវឌ្ឍវិស័យទេសចរណ៍រវាងកម្ពុជានិងទីក្រុងប៉េកាំង និងការបង្កើតផលិតផលទេសចវប្បធម៌ច្នៃប្រឌិតដល់ការបង្កើតមជ្ឈមណ្ឌល AR/VR នូវប្រវត្តិប្រាសាទអង្គរវត្ត ការបង្កើតនូវភូមិវប្បធម៌អរូបីកម្ពុជា-ចិន ដោយបង្តើតការធ្វើផលិតផលអរូបីដោយដៃរបស់ប្រទេសចិនមកធ្វើការដាក់តាំងនៅកម្ពុជា។
ភាគីទាំងពីរក៏បានលើកឡើងអំពីការបើកឡើងវិញនូវកម្មវិធី Smile of Angkor Show សៀមរាប និងការពង្រីកនូវការលក់សំបុត្រ Smile of Angkor Show តាមប្រព័ន្ធ Online។ អ្វីដែលកាន់តែពិសេសនោះ គឺការរៀបចំការប្រគំតន្ត្រីខ្នាតយក្សរបស់តារាចម្រៀងចិន លោក Jay Chou នៅក្នុងប្រទេសកម្ពុជានាពេលខាងមុខនេះ៕