ចិនមកសិក្សាឈ្វេងយល់ពីអត្ថប្រយោជន៍ និងការអនុវត្តរបបសន្តិសុខសង្គមកម្ពុជា
ប្រទេសចិនបានចាប់អារម្មណ៍ លើរបបសន្តិសុខសង្គម របស់កម្ពុជា ហើយបានចាត់តាំងគណៈប្រតិភូមកសិក្សាឈ្វេងយល់អំពីអត្ថប្រយោជន៍និងការអនុវត្តរបបសន្តិសុខសង្គមកម្ពុជា។
នៅថ្ងៃទី២៥ ខែកញ្ញា ឆ្នាំ២០២៤ លោក ទូ ហួរជា (Du Huajie) ប្រធានមជ្ឈមណ្ឌលសេវាកម្មធនធានមនុស្សខេត្តយូណានប្រទេសចិន បានដឹកនាំគណៈប្រតិភូចិនជួបពិភាក្សាការងារជាមួយលោកបណ្ឌិត ហេង សុផាន់ណារិទ្ធ អគ្គនាយករង ប.ស.ស តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម (ប.ស.ស) នៃក្រសួងការងារនិងបណ្ដុះបណ្ដាលវិជ្ជាជីវៈ ដើម្បីសិក្សាឈ្វេងយល់អំពីអត្ថប្រយោជន៍និងការអនុវត្តរបបសន្តិសុខសង្គមនៅកម្ពុជា ព្រមទាំងការផ្ដល់សេវារបស់ ប.ស.ស ដោយផ្ទាល់ រួមមានសេវាចុះបញ្ជីកានិងតាវកាលិកដល់សមាជិក ប.ស.ស។
នៅក្នុងជំនួបនោះ លោក ហេង សុផាន់ណារិទ្ធ បានលើកឡើងអំពីសាបានរបស់ ប.ស.ស រួមមាន ច្បាប់ស្ដីពីរបបសន្តិសុខសង្គម ការអនុវត្តផ្នែកហានិភ័យការងារ ផ្នែកថែទាំសុខភាព ផ្នែកប្រាក់សោធន ផ្នែកនិកម្មភាពការងារ ដោយគ្របដណ្ដប់បុគ្គលដែលស្ថិតក្នុងវិស័យសាធារណៈ បុគ្គលទាំងឡាយស្ថិតក្រោមបទប្បញ្ញត្តិនៃច្បាប់ស្ដីពីការងារ ដោយរួមបញ្ចូលបុគ្គលិកធ្វើការតាមផ្លូវអាកាស និងនាវាសមុទ្រ ព្រមទាំងអ្នកបម្រើក្នុងផ្ទះនិងបុគ្គលស្វ័យនិយោជន៍ សំដៅធានាប្រសិទ្ធភាព និរន្តរភាព និង សង្គតិភាព ការអនុវត្តរបបសន្តិសុខសង្គមនៅកម្ពុជាស្របតាមបរិបទនៃប្រទេសនីមួយៗនៅក្នុងតំបន់និងពិភពលោក។
លោកបានបន្ថែមទៀតថា បច្ចុប្បន្ន ប.ស.ស កំពុងសិក្សាពង្រីកការគ្របដណ្ដប់របបសន្តិសុខសង្គមដល់ប្រជាជនគោលដៅបន្ថែមទៀត ដើម្បីឆ្ពោះទៅរកការគ្របដណ្ដប់សុខភាពជាសកលនៅកម្ពុជា ស្របតាមផែនការយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា។
លោក ទូ ហួរជា មានប្រសាសន៍ថា ដំណើរទស្សនកិច្ចលើកនេះជាជំហានឆ្ពោះទៅពង្រឹងកិច្ចសហប្រតិបត្តិការរវាងអង្គភាពទាំងពីរ ដើម្បីចែករំលែកនិងផ្លាស់ប្ដូរបទពិសោធគ្នាទៅវិញទៅមក។
បន្ទាប់ពីជំនួបទ្វេភាគីរួច គណៈប្រតិភូចិនបានបន្តចុះមើលនិងស្វែងយល់ពីការផ្តល់សេវារបស់ ប.ស.ស (សេវាចុះបញ្ជិកា និងសេវាតាវកាលិក) និងមជ្ឈមណ្ឌលឆ្លើយតបនិងផ្តល់ព័ត៌មានពាក់ព័ន្ធនឹងសេវាសាធារណៈរបស់ក្រសួងការងារនិងបណ្ដុះបណ្ដាលវិជ្ជាជីវៈដោយផ្ទាល់នៅស្នាក់ការកណ្ដាល ប.ស.ស រាជធានីភ្នំពេញ៕
评论被关闭。