អតីតអគ្គទេសាភិបាលធនាគារជាតិនៃកម្ពុជា លោក ជា ចាន់តូ ទទួលមរណភាព ក្នុងជន្មាយុ ៧៣ ឆ្នាំ
លោក ជា ចាន់តូ អតីតអគ្គទេសាភិបាលនិងជាទេសាភិបាលកិត្តិយសធនាគារជាតិនៃកម្ពុជា និងជាតំណាងរាស្រ្តមណ្ឌលខេត្តកំពង់ធំ បានទទួលមរណភាពនៅថ្ងៃទី២៥ ខែតុលា ឆ្នាំ២០២៤ វេលាម៉ោង ១០ និង ៣៥ នាទីព្រឹក នៅរាជធានីភ្នំពេញ ក្នុងជន្មាយុ ៧៣ ឆ្នាំ ដោយរោគាពាធ។
លោក ជា ចាន់តូ ទទួលមរណភាពក្នុងជន្មាយុ ៧៣ ឆ្នាំ
លោកស្រី ជា សិរី អគ្គទេសាភិបាលធនាគារជាតិនៃកម្ពុជាបានបង្ហោះរូបលោកស្រីជាមួយលោក ជា ចាន់តូ ដែលជាឪពុកនៅលើហ្វេសប៊ុកផ្លូវការរបស់លោកស្រីនៅថ្ងៃទី២៥ ខែតុលា ឆ្នាំ២០២៤ផងដែរ ដោយមានភ្ជាប់ជាមួយខ្លឹមសារថា៖ “In loving memory of my dearest father.” (ក្នុងការចងចាំដោយក្តីស្រឡាញ់របស់ឪពុកជាទីស្រឡាញ់របស់ខ្ញុំ)។
រូបថតដែលលោកស្រី ជា សិរី បង្ហោះលើហ្វេសប៊ុករបស់លោកស្រីនៅថ្ងៃទី២៥ តុលា ២០២៤
សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានផ្ញើសារលិខិតរំលែកមរណទុក្ខជូនលោកស្រី ខៀវ ស៊ីណា ភរិយាលោក ជា ចាន់តូ និងលោកស្រី ជា សិរី កូនស្រីលោក ជា ចាន់តូ និងជាអគ្គទេសាភិបាលធនាគារជាតិនៃកម្ពុជា។
សម្តេចទាំងពីរ បានសម្តែងនូវសេចក្តីក្តុកក្តួលរំជួលចិត្តជាពន់ពេក និងសោកស្តាយឥតឧបមាចំពោះមរណភាពរបស់លោក ជា ចាន់តូ។ ដោយចាត់ទុកមរណភាពរបស់លោក ជា ចាន់តូ គឺជាការបាត់បង់ឪពុក ឪពុកក្មេក ជីតា ដែលប្រកបដោយព្រហ្មវិហារធម៌មិនចេះរីងស្ងួតចំពោះកូន ចៅប្រុស ចៅស្រីជាទីស្រឡាញ់ទាំងអស់ ហើយក៏ជាការបាត់បង់នូវឥស្សរជនដ៏ឆ្នើមរបស់ជាតិ ដែលតែងតែបានធ្វើ ពលិកម្មគ្រប់បែបយ៉ាងក្នុងបុព្វហេតុបម្រើជាតិ សាសនា ព្រះមហាក្សត្រ លើកស្ទួយកិត្យានុភាពជាតិលើឆាកអន្តរជាតិ និងធ្លាប់បានបំពេញបេសកកម្មដ៏ឧត្តុង្គឧត្តមបំផុតជូនប្រទេសជាតិ តាមរយៈការកំណត់និងដឹកនាំគោលនយោបាយរូបិយវត្ថុ សំដៅរួមចំណែកជំរុញការអភិវឌ្ឍសង្គមសេដ្ឋកិច្ច ក្នុងក្របខណ្ឌគោលនយោបាយសេដ្ឋកិច្ច និងហិរញ្ញវត្ថុនៃព្រះរាជាណាចក្រកម្ពុជាជារៀងរហូតមក។
លោក ជា ចាន់តូ កាលនៅជាអគ្គទេសាភិបាលនៃធនាគារជាតិនៃកម្ពុជា
គួររម្លឹកថា លោក ជា ចាន់តូ បានកាន់តំណែងជាអគ្គទេសាភិបាលធនាគារជាតិនៃកម្ពុជារយៈពេល ២៥ ឆ្នាំ គឺចាប់ពីឆ្នាំ១៩៩៨ដល់ឆ្នាំ២០២៣។ បន្ទាប់ពីរាជរដ្ឋាភិបាលនីតិកាលទី៧បានលេចជារូបរាងឡើង លោក ជា ចាន់តូ ត្រូវបានព្រះមហាក្សត្រតែងតាំងលោកជាអគ្គទេសាភិបាលកិត្តិយសនៃធនាគារជាតិកម្ពុជា ដែលមានឋានៈស្មើទេសរដ្ឋមន្ត្រី។
សពរបស់លោក ជា ចាន់តូ តម្កល់ធ្វើបុណ្យតាមប្រពៃណីសាសនានៅផ្ទះលេខ១៣៥ ផ្លូវម៉ាស៊ីនទឹក សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ៕
评论被关闭。