ក្រុមប្រឹក្សាអភិវឌ្ឍន៍កម្ពុជា៖ ស្ថានភាពវិនិយោគនៅកម្ពុជា នឹងមានកំណើននៅឆ្នាំខាងមុខ
លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា (CDC) បានអះអាងថា ដោយផ្អែកលើកាលានុវត្តភាព ក៏ដូចជានិន្ននាការនៃស្ថានភាពវិនិយោគនៅកម្ពុជាដែលកំពុងមានកំណើនក្នុងឆ្នាំ២០២៤ ការវិនិយោគរបស់កម្ពុជាសម្រាប់ឆ្នាំបន្តបន្ទាប់ខាងមុខ នឹងទទួលបានកំណើននិងការរីកចម្រើនគួរឱ្យកត់សម្គាល់ជាក់ជាមិនខាន។
លោក ស៊ុន ចាន់ថុល បានថ្លែងបែបនេះក្នុងឱកាសដែលលោកបានដឹកនាំកិច្ចប្រជុំគណៈកម្មាធិការសម្របសម្រួលការងារសម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.រ.ជ.) កាលពីថ្ងៃទី១៩ ខែធ្នូ ឆ្នាំ២០២៤ ដែលមានការចូលរួមពីតំណាងក្រសួង ស្ថាប័នពាក់ព័ន្ធដែលជាសមាជិក គ.ស.រ.ជ. និងសភាពាណិជ្ជកម្មកម្ពុជាដែលជាតំណាងវិស័យឯកជន សរុបប្រមាណ ៩០ រូប។
លោកបានលើកឡើងអំពីស្ថានភាពវិនិយោគនៅកម្ពុជាដែលកំពុងមានកំណើនគួរឱ្យកត់សម្គាល់ក្នុងឆ្នាំ២០២៤ កាលានុវត្តភាព ក៏ដូចជានិន្ននាការនៃកំណើនសម្រាប់ឆ្នាំបន្តបន្ទាប់ខាងមុខ វឌ្ឍនភាពនៃការងាររៀបចំនិងដាក់ឱ្យប្រើប្រាស់ជាផ្លូវការនូវប្រព័ន្ធចុះបញ្ជីគម្រោងវិនិយោគតាម Online (cdcIPM) យន្តការជំរុញនិងទាក់ទាញវិនិយោគពីបរទេស ការផ្តល់កិច្ចសម្រួលនិងសេវាថែទាំវិនិយោគ ព្រមទាំងយន្តការនៃកិច្ចសន្ទនាទ្វេភាគីរវាងរាជរដ្ឋាភិបាល តំណាងដោយក្រុមប្រឹក្សាអភិវឌ្ឍកម្ពុជា ជាមួយនឹងផ្នែកឯកជន តាមរយៈកិច្ចប្រជុំគណៈកម្មាធិការចម្រុះនានា នាពេលកន្លងមកផងដែរ។
កិច្ចប្រជុំ គ.ស.រ.ជ. រៀបចំឡើងក្នុងគោលបំណង៖ ១. ពិនិត្យលើវឌ្ឍនភាពការងាររបស់ក្រុមប្រឹក្សាអភិវឌ្ឍន៍កម្ពុជា ពាក់ព័ន្ធនឹងយន្តការ វេទិការាជរដ្ឋាភិបាល-ផ្នែកឯកជន (G-PSF)។ ២. កិច្ចពិភាក្សាលើវឌ្ឍនភាពការងារ បញ្ហាប្រឈម និង សំណូមពរ ក្នុងការបង្កើនប្រសិទ្ធភាពនៃកិច្ចសន្ទនារវាងក្រុមការងារផ្នែករាជរដ្ឋាភិបាលនិងផ្នែកឯកជនតាមវិស័យទាំង១៦។ ទី៣. ពិនិត្យនិងពិភាក្សាលើការត្រៀមរៀបចំរបាយការណ៍វឌ្ឍនភាពនៃការអនុវត្ត វិធានការដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជនប្រចាំឆមាសទី២ ឆ្នាំ២០២៤។
នៅក្នុងកិច្ចប្រជុំនេះ លោក ស៊ុន ចាន់ថុល ក៏បានលើកឡើងនូវចំណុចសំខាន់ៗមួយចំនួន រួមមាន៖ របៀបវារៈនិងគោលបំណងនៃកិច្ចប្រជុំ សារៈសំខាន់នៃយន្តការ G-PSF ក្នុងការរួមចំណែកធ្វើឱ្យកាន់តែប្រសើរឡើងនូវបរិយាកាសធុរកិច្ចនិងវិនិយោគនៅកម្ពុជា វិធានការកែទម្រង់មុតស្រួចជាកញ្ចប់សំខាន់ៗ ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩ សាវតារនៃការបង្កើតការពង្រឹងនិងពង្រីកតួនាទីភារកិច្ច ក៏ដូចជាវិសាលភាពការងាររបស់ គ.ស.រ.ជ. និងការពង្រីកវិសាលភាពជាបន្តបន្ទាប់របស់ក្រុមការងារតាមវិស័យនៃយន្តការ G-PSF ក៏ដូចជាវឌ្ឍនភាពការងារសំខាន់ៗដែលសម្រេចបានក្នុងយន្តការ G-PSF នាពេលកន្លងមក។
យោងតាមក្រុមប្រឹក្សាអភិវឌ្ឍន៍កម្ពុជា នៅក្នុងឆ្នាំ២០២៤ រាជរដ្ឋាភិបាលកម្ពុជាបានអនុម័តគម្រោងវិនិយោគចំនួន ៤១៤ គម្រោង មានការកើនឡើងចំនួន ១៤៦ គម្រោង ស្មើនឹង៥៤% បើធៀបនឹងឆ្នាំ២០២៣ដែលមាន ២៦៨ គម្រោង។ រីឯទុនវិនិយោគបានកើនដល់ចំនួន ៦,៩ ប៊ីលានដុល្លារអាម៉េរិក កើនឡើងចំនួន ១,៩៧៣ ប៊ីលានដុល្លារ ស្មើនឹង៤០% បើធៀបនឹងឆ្នាំ២០២៣ដែលមានទុនវិនិយោគ ៤,៩២៧ ប៊ីលានដុល្លារ៕
评论被关闭。