ក្រុមហ៊ុនជប៉ុន គ្រោងវិនិយោគកែច្នៃសម្បកគ្រាប់ស្វាយចន្ទី ទៅជាទឹកខ្មេះ ប្រេង និង កាកសំណល់ចំណីសត្វ
ក្រុមហ៊ុន Nippon Koei Business Partners របស់ជប៉ុន គ្រោងវិនិយោគលើវិស័យកែច្នៃគ្រាប់ស្វាយចន្ទី ឱ្យទៅជាទឹកខ្មេះ ប្រេង និង កាកសំណល់ចំណីសត្វ។
លោក Tsutomu TAMURA អគ្គនាយករងក្រុមហ៊ុន Nippon Koei Business Partners បានដឹកនាំគណៈប្រិតភូក្រុមហ៊ុន និងបានចូលជួបសម្តែងការគួរសមជាមួយលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដើម្បីពិភាក្សាពីគម្រោងវិនិយោគវិស័យស្វាយចន្ទីនៅកម្ពុជា។
ក្នុងឱកាសនៃជំនួប លោក Tsutomu TAMURA បានបង្ហាញពីចំណាប់អារម្មណ៍ក្នុងការវិនិយោគលើវិស័យស្វាយចន្ទីដើម្បីនាំចេញ ជាពិសេសផ្តោតលើការកែច្នៃផ្លែនិងសម្បកគ្រាប់ស្វាយចន្ទីទៅជាទឹកខ្មេះ ប្រេង និង កាកសំណល់ដែលសេសសល់នឹងយកទៅធ្វើជាចំណីសត្វ (គោ)។
ជាការឆ្លើយតប លោក ជា វុទ្ធី បានលើកឡើងពីសក្តានុពលរបស់វិស័យស្វាយចន្ទីនៅកម្ពុជា តំបន់សក្តានុពលសម្រាប់ដាំដុះស្វាយចន្ទី និងការទាញយកផលប្រយោជន៍ជាអតិបរិមាពីស្វាយចន្ទី។ លោកបានលើកទឹកចិត្តឱ្យក្រុមហ៊ុនឆាប់ធ្វើការសម្រេចចិត្តមកបណ្តាក់ទុននៅកម្ពុជាក្នុងវិស័យស្វាយចន្ទី ពីព្រោះបច្ចុប្បន្នរាជរដ្ឋាភិបាលកម្ពុជាកំពុងយកចិត្តទុកដាក់យ៉ាងខ្លាំងលើវិស័យនេះ ជាពិសេសការកែច្នៃគ្រាប់ស្វាយចន្ទី៕
评论被关闭。