ក្រសួងការបរទេស៖ កម្ពុជាមិនទាន់ទទួលបានព័ត៌មានពីអាម៉េរិក ទាក់ទងនឹងការបញ្ជូនពលរដ្ឋខ្មែររស់នៅខុសច្បាប់មកកម្ពុជាវិញនៅឡើយ
ក្រសួងការបរទេស និងសហប្រតិបត្តិការអន្តរជាតិកម្ពុជាបានឱ្យដឹងថា កម្ពុជានៅមិនទាន់ទទួលបានការជូនព័ត៌មានរបស់សហរដ្ឋអាម៉េរិក ទាក់ទងនឹងការបញ្ជូនពលរដ្ឋខ្មែររស់នៅអាម៉េរិកខុសច្បាប់ ត្រឡប់មកប្រទេសកម្ពុជានៅឡើយទេ។
អ្នកនាំពាក្យក្រសួងការបរទេស លោក ជុំ សន្ទរី បានថ្លែងប្រាប់បណ្តាញសារព័ត៌មានថា រហូតមកដល់ពេលនេះ ក្រសួងការបរទេសកម្ពុជានៅមិនទាន់ទទួលបានការជូនព័ត៌មានផ្លូវការណាមួយ ពាក់ព័ន្ធនឹងការបញ្ជូនពលរដ្ឋខ្មែរដែលរស់នៅអាម៉េរិកខុសច្បាប់ ឱ្យត្រឡប់មកកម្ពុជានៅឡើយទេ។ ទោះជាយ៉ាងណា កម្ពុជានឹងសហការពេញលេញលើការបញ្ជូន និងទទួលពលរដ្ឋខ្មែរត្រឡប់មកវិញ ស្របតាមស្មារតីអនុស្សរណៈនៃការយោគយល់គ្នា (MOU) ដែលបានចុះហត្ថលេខារវាងកម្ពុជា និងសហរដ្ឋអាម៉េរិក។
យោងតាមឯកសារពីភ្នាក់ងារអនុវត្តច្បាប់អន្តោប្រវេសន៍ និងគយ (ICE) របស់សហរដ្ឋអាម៉េរិក បានបង្ហាញថា មានជនអន្តោប្រវេសន៍កម្ពុជាចំនួន ១ ៧៤៧ នាក់ស្ថិតក្នុងបញ្ជីបញ្ជូនត្រឡប់មកប្រទេសកំណើតវិញ។ ភាគីសហរដ្ឋអាម៉េរិកស្នើឱ្យរដ្ឋាភិបាលបរទេស ចាត់វិធានការសមស្របដើម្បីបញ្ជាក់សញ្ជាតិរបស់ជនដែលសង្ស័យ រួមមានការសម្ភាសន៍ ការចេញឯកសារធ្វើដំណើរទាន់ពេល និង ទទួលយកការវិលត្រឡប់របស់ជនជាតិរបស់ពួកគេវិញ។
ការចាត់វិធានការរឹងរ៉ឹងលើជនអន្តោប្រវេសន៍ខុសច្បាប់របស់សហរដ្ឋអាម៉េរិក ធ្វើឡើងបន្ទាប់ពីលោក ដូណាល់ ត្រាំ ចូលកាន់តំណែងប្រធានាធិបតីអាម៉េរិកជាលើកទី២ ដោយលោកបានប្ដេជ្ញានូវការសន្យារបស់ខ្លួនក្នុងការបណ្ដេញជនអន្តោប្រវេសន៍ខុសច្បាប់ពីសហរដ្ឋអាម៉េរិកឱ្យអស់ តាមរយៈការបញ្ជូនចេញទ្រង់ទ្រាយធំ។
យោងតាមការិយាល័យស្ថិតិរបស់ក្រសួងសន្ដិសុខមាតុភូមិអាម៉េរិក ជនអន្តោប្រវេសន៍ដែលគ្មានឯកសារប្រមាណ ១១ លាននាក់កំពុងរស់នៅក្នុងសហរដ្ឋអាមេរិក៕
评论被关闭。