ទេសាភិបាលធនាគារជាតិកម្ពុជា ជា សិរី ជួបពិភាក្សាការងារជាមួយគណៈប្រតិភូធនាគារពិភពលោក
ថ្ងៃទី១៣ ខែកុម្ភៈ ឆ្នាំ២០២៥ លោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា បានជួបពិភាក្សាការងារជាមួយគណៈប្រតិភូធនាគារពិភពលោក ដែលដឹកនាំដោយលោកស្រី Lalita M. Moorty នាយកធនាគារពិភពលោកប្រចាំតំបន់អាស៊ីខាងកើតនិងប៉ាស៊ីហ្វិក នៅធនាគារជាតិនៃកម្ពុជា អគារវត្តភ្នំ រាជធានីភ្នំពេញ។
ក្នុងឱកាសនៃជំនួប លោកស្រី Lalita M. Moorty បានលើកឡើងអំពីស្ថានភាពទូទៅនៃសេដ្ឋកិច្ចពិភពលោក បេសកកម្មរបស់ធនាគារពិភពលោក វឌ្ឍនភាពនៃវិស័យហិរញ្ញវត្ថុក្នុងតំបន់ និង លទ្ធភាពរបស់ធនាគារពិភពលោកក្នុងការផ្តល់ជំនួយបច្ចេកទេសនានា ជូនធនាគារជាតិនៃកម្ពុជាតាមការចាំបាច់។ លោកស្រីក៏បានស្វែងយល់បន្ថែមអំពីស្ថានភាពទូទៅនៃវិស័យធនាគារនៅកម្ពុជានាពេលបច្ចុប្បន្ន។
ជាការឆ្លើយតប លោកស្រី ជា សិរី បានជម្រាបជូនអំពីស្ថានភាពទូទៅនៃវិស័យធនាគារនៅកម្ពុជា ដែលបន្តរក្សាបាននូវស្ថិរភាពនិងជំនឿទុកចិត្តរបស់សាធារណជន។ កន្លងមក ធនាគារជាតិនៃកម្ពុជាក៏បានដាក់ចេញនូវគោលនយោបាយជាច្រើន ដូចជាគោលនយោបាយម៉ាក្រូប្រុងប្រយ័ត្ន និងការដាក់ឱ្យប្រើប្រាស់នូវប្រព័ន្ធឌីជីថល ជាពិសេសប្រព័ន្ធទូទាត់បាគង ដែលមិនត្រឹមតែត្រូវបានប្រើប្រាស់ជាប្រព័ន្ធទូទាត់ប៉ុណ្ណោះទេ ថែមទាំងបានប្រើប្រាស់ជាសូចនាករនៃលំហូរសាច់ប្រាក់របស់សហគ្រាសធន់តូចនិងមធ្យម សម្រាប់ការវាយតម្លៃផ្នែកឥណទាន ដែលនេះជាជំហានថ្មីមួយសម្រាប់វិស័យធនាគារនៅកម្ពុជា។
លោកស្រីក៏បានគូសបញ្ជាក់អំពីតួនាទីរបស់ក្រុមហ៊ុនក្រេឌីតប៊ុយរ៉ូកម្ពុជា ក្នុងការជួយលើកកម្ពស់ប្រសិទ្ធភាពនៃការវិភាគឥណទានរបស់គ្រឹះស្ថានធនាគារនិងហិរញ្ញវត្ថុ ដែលជាចំណែកមួយនៃវិធានការពារនិងរក្សាស្ថិរភាពហិរញ្ញវត្ថុ។ ធនាគារជាតិនៃកម្ពុជាក៏ដៃគូសហការដ៏សំខាន់របស់ក្រសួង-ស្ថាប័នរាជរដ្ឋាភិបាល និងដៃគូអភិវឌ្ឍនានាផងដែរ។
លោកស្រី ជា សិរី ក៏បានលើកឡើងពីការរួមចំណែករបស់ធនាគារពិភពលោក ក្នុងការអភិវឌ្ឍវិស័យធនាគារនិងហិរញ្ញវត្ថុនៅកម្ពុជា ធនាគារជាតិនៃកម្ពុជាក៏នឹងបន្តកិច្ចសហប្រតិបត្តិការល្អ ជាមួយធនាគារពិភពលោកនិងដៃគូអភិវឌ្ឍនានា ស្របតាមតម្រូវការនិងបរិបទរបស់កម្ពុជាផងដែរ៕