អ្នកនាំពាក្យនាយករដ្ឋមន្ត្រី៖ ការផ្សាយព័ត៌មានតាមហ្វេសប៊ុករបស់នាយករដ្ឋមន្ត្រី គឺដើម្បីផ្សាយព័ត៌មានឱ្យបានទូលំទូលាយ និងមិនមានប្រើថវិកាជាតិឡើយ
ប្រធានក្រុមអ្នកនាំពាក្យរបស់នាយករដ្ឋមន្ត្រីកម្ពុជា លោក មាស សុភ័ណ្ឌ បានឱ្យដឹងថា ការចំណាយថវិកាផ្សព្វផ្សាយព័ត៌មានតាមបណ្តាញទំនាក់ទំនងសង្គមហ្វេសប៊ុក (Facebook) របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា គឺក្នុងគោលបំណងរុញព័ត៌មាននានាឱ្យដល់ដៃប្រជាពលរដ្ឋនិងឱ្យកាន់តែទូលំទូលាយ ដោយមិនមានប្រើប្រាស់ថិវកាជាតិឡើយ។
ការលើកឡើងរបស់ក្រុមអ្នកនាំពាក្យនាយករដ្ឋមន្ត្រីកម្ពុជា គឺជាការឆ្លើយតបទៅនឹងបណ្តាញសារព័ត៌មានក្រៅស្រុក ដែលបានផ្សាយពីរបាយការណ៍របស់ក្រុមហ៊ុន Meta ដោយបានលើកឡើងថា គិតចាប់ពីខែកញ្ញា ឆ្នាំ២០២២ ដល់ខែកុម្ភៈ ឆ្នាំ២០២៥ សម្តេចធិបតី ហ៊ុន ម៉ាណែត បានចំណាយថវិកាជាង ១,៥ លានដុល្លារអាម៉េរិកក្នុងការផ្សាយព័ត៌មានតាមហ្វេសប៊ុក។
ក្រុមហ៊ុន Meta បានផ្សព្វផ្សាយរបាយការណ៍ស្តីពីអ្នកបង់លុយដើម្បីផ្សព្វផ្សាយលើទំព័រហ្វេសប៊ុក ចាប់ពីខែកញ្ញា ឆ្នាំ២០២២ ដល់ខែកុម្ភៈ ឆ្នាំ២០២៥។ របាយការណ៍នេះបានបង្ហាញថា នាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត បានចំណាយថវិកាជាង ១,៥ លានដុល្លារដើម្បីផ្សព្វផ្សាយតាមបណ្តាញសង្គមហ្វេសប៊ុកនូវសកម្មភាពការងារដឹកនាំប្រទេស សកម្មភាពប្រចាំថ្ងៃ បទចម្រៀង និង សារនយោបាយ។
លោក មាស សុភ័ណ្ឌ បានគូសបញ្ជាក់ថា ការចំណាយថវិកាសម្រាប់ការផ្សាយព័ត៌មានរបស់សម្តេចធិបតី មិនមែនទើបតែកើតមាននាពេលបច្ចុប្បន្ននេះទេ ពោលគឺបានធ្វើជាយូរមកហើយ។ ទន្ទឹមនឹងនេះ ការចំណាយថវិកាផ្សាយព័ត៌មានលើបណ្តាញទំនាក់ទំនងសង្គម គឺមិនមានអ្វីខុសពីមេដឹកនាំនានាលើពិភពលោក ក៏ដូចជាអ្នកធ្វើធុរកិច្ចឡើយ។ ម្យ៉ាងទៀត ថវិកាដែលបានចំណាយលើការផ្សាយនេះ មិនមែនជាថវិកាជាតិនោះឡើយ ហើយការផ្សព្វផ្សាយនេះទៀតសោត ក៏ពុំមែនជាការធ្វើប្រជាភិថុតិដូចការចោទប្រកាន់ដែរ។ លោកបានចាត់ទុកការចោទប្រកាន់ពាក់ព័ន្ធនឹងការចំណាយថវិកាលើការផ្សព្វផ្សាយព័ត៌មានតាមបណ្តាញសង្គមរបស់សម្តេចនាយករដ្ឋមន្ត្រី គឺបានបង្កប់នូវចេតនាទុច្ចរិត ដែលនាំឱ្យប្រជាជនមានការយល់ច្រឡំមកលើរាជរដ្ឋាភិបាល ក្នុងគោលបំណងដើម្បីតែបម្រើផលប្រយោជន៍នយោបាយរបស់ពួកគេតែប៉ុណ្ណោះ៕