ក្រសួងមហាផ្ទៃចេញប្រកាសអន្តរក្រសួង ស្តីពីការគ្រប់គ្រងដ្រូន បុគ្គលដែលពុំគោរពតាមលក្ខខណ្ឌកំណត់ ត្រូវប្រឈមមុខនឹងច្បាប់ជាធរមាន
ក្រសួងមហាផ្ទៃកម្ពុជាបានចេញប្រកាសអន្តរក្រសួង ស្តីពីការគ្រប់គ្រងអាកាសយានគ្មានមនុស្សបើក (Drone ដ្រូន) ដើម្បីកំណត់អំពីការគ្រប់គ្រងទិន្នន័យ តំបន់ហាមឃាត់ និង ការប្រើប្រាស់ដ្រូន ព្រមទាំងកំណត់អំពីវិធានការសន្តិសុខក្នុងការប្រើប្រាស់ដ្រូន ដើម្បីធានាសន្តិសុខ សណ្តាប់ធ្នាប់សាធារណៈ និង សុវត្ថិភាពសង្គមនៅក្នុងប្រទេសកម្ពុជា។
យោងតាមសេចក្តីប្រកាសអន្តរក្រសួង ដែលរួមមានក្រសួងមហាផ្ទៃ ក្រសួងកសិកម្ម រុក្ខាប្រមាញ់ និង ទេសាទ និង រដ្ឋលេខាធិការដ្ឋានអាកាសចរណ៍ស៊ីវិល កាលពីថ្ងៃទី១៤ ខែកុម្ភៈ ឆ្នាំ២០២៥ បានបញ្ជាក់ថា ប្រកាសអន្តរក្រសួងនេះមានវិសាលភាពអនុវត្តចំពោះដ្រូនដែលអាចផ្ទុកទម្ងន់ចាប់ពី ២ គីឡូក្រាមឡើង លើកលែងតែដ្រូនដែលប្រើប្រាស់សម្រាប់បម្រើឱ្យវិស័យការពារជាតិនិងសន្តិសុខជាតិ ដែលត្រូវកំណត់ដោយលិខិតបទដ្ឋានគតិយុត្តដោយឡែក។
ចំពោះការគ្រប់គ្រងទិន្នន័យនិងការប្រើប្រាស់ បុគ្គលដែលកំពុងគ្រប់គ្រង កាន់កាប់ ឬ ប្រើប្រាស់ដ្រូន ត្រូវធ្វើស្វ័យប្រកាសទិន្នន័យដ្រូនទៅអធិការដ្ឋាននគរបាលក្រុង ស្រុក ខណ្ឌ នៃទីកន្លែងដែលដ្រូនស្ថិតនៅ។ ការធ្វើស្វ័យប្រកាសទិន្នន័យដ្រូនដែលកំណត់ក្នុងប្រកាសអន្តរក្រសួងនេះ មិនតម្រូវឱ្យបង់កម្រៃសេវាឡើយ។
ចំពោះលក្ខខណ្ឌនិងបម្រាមនៃការបង្ហោះដ្រូន អ្នកគ្រប់គ្រង កាន់កាប់ ឬ ប្រើប្រាស់ត្រូវគោរពលក្ខខណ្ឌដូចខាងក្រោម៖
- ត្រូវមានអាយុចាប់ពី ១៨ ឆ្នាំឡើងទៅ
- ត្រូវបង្ហោះក្នុងចន្លោះចាប់ពីម៉ោង ៦ ព្រឹកដល់ម៉ោង ៦ ល្ងាច។ ក្នុងករណីខុសពីម៉ោងនេះ ត្រូវមានការអនុញ្ញាតដោយឡែក
- ត្រូវយល់ដឹងពីការព្យាករអាកាសធាតុនៅតំបន់ដែលត្រូវបង្ហោះ
- មិនត្រូវបង្ហោះសំកាំងឬឆ្វែលពីលើទីតាំងឯកជន លើកលែងតែមានការអនុញ្ញាតពីម្ចាស់ទីតាំងនោះ
- មិនត្រូវថតរូប ថតសំឡេង ឬ ថតវីដេអូ ដោយគ្មានការអនុញ្ញាតឡើយ លើកលែងតែការថតនោះមិនសំដៅដល់ការកំណត់អត្តសញ្ញាណជនណាម្នាក់ ឬក្រុមជាក់លាក់ណាមួយ
- មិនត្រូវបង្ហោះពីលើក្រុមមនុស្ស លើកលែងតែមានការអនុញ្ញាតដោយឡែក
- មិនត្រូវបង្ហោះពីលើហ្វូងសត្វ លើកលែងតែមានការអនុញ្ញាតដោយឡែក
- មិនត្រូវបង្ហោះពីលើរាល់ទីតាំងដែលមានឧបទ្ទវហេតុ អគ្គីភ័យ រលំអគារ ធ្លាក់យន្តហោះ គ្រោះថ្នាក់ចរាចរណ៍ ឬ ឧបទ្ទវហេតុផ្សេងៗទៀត ដែលកំពុងស្ថិតនៅក្នុងប្រតិបត្តិការសង្គ្រោះរបស់សមត្ថកិច្ច លើកលែងតែមានការអនុញ្ញាតពីសមត្ថកិច្ចគ្រប់គ្រងប្រតិបត្តិការនោះ
- មិនត្រូវបង្ហោះពីលើឬនៅក្បែរតំបន់កំពុងប្រតិបត្តិការរបស់សមត្ថកិច្ច
- មិនត្រូវបង្ហោះបដាផ្សព្វផ្សាយឬបាចខិតបណ្ណឃោសនាផ្សេងៗ លើកលែងតែមានការអនុញ្ញាតដោយឡែក
- មិនត្រូវបង្ហោះដ្រូនជាក្រុមចាប់ពី ៥ គ្រឿងឡើងទៅ លើកលែងតែមានការអនុញ្ញាតដោយឡែក
- ត្រូវទទួលខុសត្រូវព្យសនកម្មចំពោះសកម្មភាពរបស់ខ្លួន
- មិនត្រូវបង្ហោះក្នុងរង្វង់ ៥០០ ម៉ែត្រពីអាកាសយានដែលកំពុងហោះហើរគ្រប់ប្រភេទ
- មិនត្រូវបង្ហោះក្នុងតំបន់ហាមឃាត់
- មិនត្រូវបង្ហោះក្នុងរង្វង់ ១០០ ម៉ែត្រពីនាវា កប៉ាល់ ឬ កាណូតឯកជន លើកលែងតែមានការអនុញ្ញាតពីអាជ្ញាធរមានសមត្ថកិច្ច
- មិនត្រូវដឹកជញ្ជូនសារធាតុមានគ្រោះថ្នាក់គ្រប់ប្រភេទ
- មិនត្រូវបង្ហោះស្ថិតក្រោមស្ថានភាពស្រវឹង ឬក្រោមឥទ្ធិពលនៃគ្រឿងញៀន។
ក្នុងករណីអ្នកគ្រប់គ្រង កាន់កាប់ ឬ អ្នកប្រើប្រាស់ដ្រូន មិនគោរពលក្ខខណ្ឌទាំងនេះ នឹងត្រូវអាជ្ញាធរមានសមត្ថកិច្ចចាត់វិធានការតាមផ្លូវច្បាប់ជាធរមាន។
សេចក្តីប្រកាសនេះក៏បានបញ្ជាក់ពីទីតាំងមួយចំនួនដែលត្រូវបានចាត់ទុកជាតំបន់ហាមឃាត់ក្នុងការបង្ហោះដ្រូន លើកលែងតែមានការអនុញ្ញាតពីសាមីស្ថាប័នឬម្ចាស់ទីតាំង ដែលទីតាំងទាំងនោះរួមមាន ព្រះបរមរាជវាំង ស្ថាប័នរដ្ឋ មន្ទីរពេទ្យ សាលារៀន និង ផ្សារ ពហុកីឡដ្ឋាន តំបន់រមណីយដ្ឋានអង្គរនិងបរិវេណប្រាសាទ លំនៅដ្ឋានប្រធានព្រឹទ្ធសភា ប្រធានរដ្ឋសភា និង លំនៅដ្ឋាននាយករដ្ឋមន្ត្រី និវេសនដ្ឋានទូត ស្ថានទូត អគ្គកុងស៊ុល និង អង្គការអន្តរជាតិ មូលដ្ឋានយោធានិងមូលដ្ឋាននគរបាលជាតិ ទីតាំងឬឃ្លាំងស្តុកសារធាតុងាយឆេះឬងាយផ្ទុះឆេះ ស្ថានីយវិទ្យុ ស្ថានីយទូរទស្សន៍ រោងចក្រចម្រាញ់ប្រេង ឧស្ម័ន រ៉ែ រោងចក្រអគ្គិសនីនិងអនុស្ថានីយអគ្គិសនី។ តំបន់ហាមឃាត់ផ្សេងទៀតនៃការបង្ហោះដ្រូន ត្រូវកំណត់ដោយប្រកាសអន្តរក្រសួងរវាងរដ្ឋមន្ត្រីក្រសួងមហាផ្ទៃ និងរដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល។
ទន្ទឹមនឹងនេះ ការបង្ហោះដ្រូនមិនត្រូវបង្ហោះលើសកម្ពស់ ១២០ ម៉ែត្រគិតចាប់ពីផ្ទៃដីឬផ្ទៃទឹក លើកលែងតែមានការអនុញ្ញាតពីរដ្ឋលេខាធិការដ្ឋានអាកាសចរណ៍ស៊ីវិល។
មិនអនុញ្ញាតឱ្យបង្ហោះក្នុងបរិវេណរង្វង់ ៣ គីឡូម៉ែត្រនិងកម្ពស់មិនឱ្យលើស ៩០ ម៉ែត្រពីរបងនៃអាកាសយានដ្ឋានស៊ីវិល និងអាកាសយានដ្ឋានយោធាឡើយ។
បុគ្គលដែលគ្រប់គ្រង កាន់កាប់ ឬ ប្រើប្រាស់ដ្រូន ដែលពុំគោរពតាមបទប្បញ្ញត្តិដែលមានចែងក្នុងប្រកាសអន្តរក្រសួងនេះ នឹងត្រូវទទួលទណ្ឌកម្មតាមច្បាប់និងលិខិតបទដ្ឋានគតិយុត្តជាធរមាន៕
评论被关闭。