រាជរដ្ឋាភិបាលចំណាយថវិកាប្រមាណ ៦០ លានដុល្លារ ពង្រីកបណ្តាញផ្គត់ផ្គង់ទឹកស្អាតជូនប្រជាពលរដ្ឋនៅខេត្ត ៥
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានឱ្យដឹងថា រាជរដ្ឋាភិបាលសម្រេចទម្លាក់កញ្ចប់ថវិកាប្រមាណ ៦០ លានដុល្លារអាម៉េរិក ដើម្បីវិនិយោគលើការពង្រីកបណ្តាញទឹកស្អាតផ្គត់ផ្គង់ជូនប្រជាពលរដ្ឋក្នុងខេត្តចំនួន ៥។
សម្តេចធិបតីបានថ្លែងឱ្យដឹងក្នុងឱកាសដឹកនាំសន្និបាតបូកសរុបសកម្មភាព និងលទ្ធផលការងារចុះមូលដ្ឋានរបស់ក្រុមការងាររាជរដ្ឋាភិបាលចុះមូលដ្ឋាន កាលពីថ្ងៃទី១៤ ខែកុម្ភៈ ឆ្នាំ២០២៥។ សម្ដេចបានគូសបញ្ជាក់ថា ការផ្គត់ផ្គង់ទឹកស្អាតជូនប្រជាពលរដ្ឋ ជាកិច្ចការមួយដែលរាជរដ្ឋាភិបាលបានយកចិត្តទុកដាក់ខ្លាំងជាច្រើនអាណត្តិមកហើយ ។ ជាលទ្ធផល រាជរដ្ឋាភិបាលបានកសាងបណ្ដាញទឹកស្អាត ដែលគ្របដណ្ដប់តំបន់ជាច្រើននៅតាមបណ្ដារាជធានី-ខេត្តនៅទូទាំងប្រទេស។
ទោះជាយ៉ាងនេះក៏ដោយ ដោយសារចំនួនប្រជាពលរដ្ឋបន្តកើនឡើងពីមួយឆ្នាំទៅមួយឆ្នាំ ធ្វើឱ្យតម្រូវការផ្គត់ផ្គង់ទឹកស្អាតកាន់តែមានច្រើនឡើងជាលំដាប់ ជាពិសេសនៅតំបន់ជនបទនិងតំបន់ដែលកកើតថ្មីៗជុំវិញទីក្រុងនិងទីប្រជុំជនធំៗ។ ដើម្បីឆ្លើយតបនឹងការកើនឡើងនៃតម្រូវការរបស់ប្រជាពលរដ្ឋ រាជរដ្ឋាភិបាលបានធ្វើការវិនិយោគជាបន្តបន្ទាប់ ក្នុងការបង្កើនសមត្ថភាពផលិតទឹកស្អាតផ្តល់ជូនប្រជាពលរដ្ឋ។
សម្តេចធិបតីបានឱ្យដឹងទៀតថា ថ្មីៗនេះ រាជរដ្ឋាភិបាលសម្រេចផ្ដល់ថវិកាចំនួន ៦០ លានដុល្លារក្នុងរយៈពេល ៣ ឆ្នាំ តាមសំណើរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ សម្រាប់ធ្វើការវិនិយោគពង្រីកហេដ្ឋារចនាសម្ព័ន្ធទឹកស្អាតនិងបណ្ដាញទឹកស្អាត ដើម្បីផ្គត់ផ្គង់ជូនប្រជាពលរដ្ឋនៅ ៥ ខេត្ត រួមមាន៖ រដ្ឋករទឹកកំពត ខេត្តកំពត រដ្ឋករទឹកស្វាយរៀង ខេត្តស្វាយរៀង រដ្ឋករទឹកស្ទឹងសែន ខេត្តកំពង់ធំ រដ្ឋករទឹកមណ្ឌលគិរី ខេត្តមណ្ឌលគិរី និង រដ្ឋករទឹកពោធិ៍សាត់ ខេត្តពោធិ៍សាត់។
សម្តេចធិបតី ហ៊ុន ម៉ាណែត បានគូសបញ្ជាក់បន្ថែមថា រាជរដ្ឋាភិបាលកម្ពុជានឹងបន្តកិច្ចការងារនេះជាជំហានៗ រហូតដល់បណ្ដាញទឹកស្អាតមានលទ្ធភាពគ្របដណ្តប់ទូទាំងប្រទេសនៅថ្ងៃអនាគត៕