លោក ជា វុទ្ធី ជួបពិភាក្សាការងារជាមួយគណៈប្រតិភូវិនិយោគិនចិន ១៨ ក្រុមហ៊ុន
នាព្រឹកថ្ងៃទី១៧ ខែកុម្ភៈ ឆ្នាំ២០២៥ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានជួបពិភាក្សាការងារជាមួយគណៈប្រតិភូក្រុមហ៊ុនចិនចំនួន ១៨ មកពីទីក្រុងនីងប៉ (Ningbo) ខេត្តជឺជាំង (Zhejiang) សាធារណរដ្ឋប្រជាមានិតចិន ដឹកនាំដោយលោកស្រី លូ ជឺឈាង (Lu Zhiqiong) អគ្គនាយកធនាគារ នីងប៉ ប្រទេសចិន នៅទីស្តីការក្រុមប្រឹក្សាអភិវឌ្ឍន៍កម្ពុជា រាជធានីភ្នំពេញ។
ជំនួបនេះបានធ្វើឡើងតាមរយៈលោកអ្នកឧកញ៉ា ពុង ឃាវសែ ប្រធានក្រុមប្រឹក្សាភិបាលធនាគារ កាណាឌីយ៉ា។
ក្រុមហ៊ុនចិនទាំង ១៨ នេះ មានកម្មវត្ថុអាជីវកម្មក្នុងវិស័យកែច្នៃកៅស៊ូ ផលិតសម្ភារៈបរិក្ខារពេទ្យ សម្ភារៈឆ្លាតវៃប្រើប្រាស់ក្នុងផ្ទះ សម្លៀកបំពាក់ និង ធនាគារ។ល។
ជាកិច្ចចាប់ផ្តើម លោក ជា វុទ្ធី បានវាយតម្លៃខ្ពស់ចំពោះការវិនិយោគរបស់ចិននៅក្នុងប្រទេសកម្ពុជា និងបានលើកទ្បើងពីសក្តានុពលក្នុងវិស័យឧស្សាហកម្ម កម្មន្តសាល ការកែច្នៃផលិតផល ការបង្កើតតំបន់សេដ្ឋកិច្ចពិសេស និង វិស័យកសិកម្ម កសិ-ឧស្សាហកម្ម។ ជាពិសេស កម្ពុជាមានដំណាំយុទ្ធសាស្ត្រជាច្រើន រួមមានស្រូវ ដំទ្បូងមី និង ស្វាយចន្ទីជាដើម ដែលទាមទារឱ្យមានការវិនិយោគកែច្នៃក្នុងស្រុក ដើម្បីបង្កើតតម្លៃបន្ថែម។ លោកក៏បានជំរុញឱ្យវិនិយោគិនធ្វើការគិតគូរ ក្នុងការបង្កើតខ្សែចង្វាក់ផលិតកម្មក្នុងវិស័យកសិកម្ម ជាពិសេសការកែច្នៃស្វាយចន្ទីដែលជាគំនិតផ្តួចផ្តើមរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
ទន្ទឹមនឹងនេះ លោកក៏បានជម្រាបជូនគណៈប្រតិភូពីស្ថានភាពវិនិយោគនៅកម្ពុជា ច្បាប់និងបទប្បញ្ញត្តិពាក់ព័ន្ធនឹងការវិនិយោគដែលបើកចំហ មានតម្លាភាព និង អាចប៉ាន់ប្រមាណទុកជាមុនបាន ព្រមទាំងការលើកទឹកចិត្តនានាផងដែរ។
ជាការឆ្លើយតប លោកស្រី លូ ជឺឈាង បានបង្ហាញនូវសុទិដ្ឋិនិយមចំពោះភាពរីកចម្រើនរបស់ប្រទេសកម្ពុជា ជាពិសេសវិស័យវិនិយោគនៅក្នុងប្រទេសកម្ពុជា។ លោកស្រីសង្ឃឹមថា តាមរយៈជំនួបលើកនេះ នឹងធ្វើឱ្យក្រុមហ៊ុនមានចំណាប់អារម្មណ៍កាន់តែខ្លាំងក្នុងការគិតគូរមកបណ្តាក់ទុនវិនិយោគនៅកម្ពុជា៕