ព្រះមហាក្សត្រកម្ពុជា កោតសរសើរចំពោះសម្តេច ហ៊ុន សែន និង ហ៊ុន ម៉ាណែត ក្នុងកិច្ចការព្រះពុទ្ធសាសនា
នាព្រឹកថ្ងៃទី១៧ ខែកុម្ភៈ ឆ្នាំ២០២៥ ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ស្តេចយាងជាព្រះរាជាធិបតីដ៏ខ្ពង់ខ្ពស់ ក្នុងព្រះរាជពិធីសម្ពោធមហាកុដិសម្តេចព្រះសង្ឃរាជ ជួន ណាត និងវិទ្យាស្ថានស្រាវជ្រាវនិងអភិរក្សសាស្រ្តាស្លឹករឹតខ្មែរ ព្រមទាំងសមិទ្ធិផលនានា ស្ថិតក្នុងវត្តឧណ្ណាលោម សង្កាត់ជ័យជំនះ ខណ្ឌដូនពេញ រាជធានីភ្នំពេញ។
មានព្រះរាជបន្ទូលក្នុងព្រះរាជពិធីនេះ ព្រះអង្គបានកោតសរសើរនិងចាត់ទុកសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភាកម្ពុជា និងជាប្រធានក្រុមឧត្ដមប្រឹក្សាព្រះមហាក្សត្រ ជាស្ថាបនិកដ៏អស្ចារ្យ ប៉ិនប្រសប់ និង ឈ្លាសវៃ ដែលធ្វើឱ្យព្រះពុទ្ធសាសនានិងវត្តអារាមមានព្រលឹងរស់ឡើងវិញ នាំឱ្យមានសន្តិភាព ស្ថិរភាព ដូចបាវចនាជាតិបច្ចុប្បន្ន ជាតិ សាសនា ព្រះមហាក្សត្រ។
ក្នុងឱកាសនោះផងដែរ ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ក៏បានមានព្រះរាជបន្ទូលកោតសរសើរចំពោះរាជរដ្ឋាភិបាលកម្ពុជា ដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានភាពឈ្លាសវៃនិងគោលនយោបាយសមស្រប ទទួលបានការរីកចម្រើននិងស្ថិរភាពសង្គមល្អប្រសើរ និងបានការពារមិនឱ្យមានបុគ្គលណាមួយប្រមាថចំពោះឬប្រទូសរ៉ាយចំពោះព្រះពុទ្ធសាសនា នៅក្នុងសម័យកាលសន្តិភាពនេះ។
ព្រះពុទ្ធសាសនាត្រូវបានការពារដោយច្បាប់។ ក្នុងនោះ រដ្ឋធម្មនុញ្ញកម្ពុជាមាត្រា ៤៣ កថាខណ្ឌទី៣បានចែងថា ព្រះពុទ្ធសាសនាជាសាសនារបស់រដ្ឋ។ ក្រមព្រហ្មទណ្ឌកម្ពុជាក៏បានការពារដល់សាសនារបស់រដ្ឋផងដែរ ដោយក្នុងមាត្រា ៥១៦ នៃក្រមព្រហ្មទណ្ឌបានចែងថា ការប្រមាថចំពោះព្រះសង្ឃ ដូនជី និង តាជី អាចប្រឈមនឹងការដាក់ទោសពន្ធនាគារពី ១ ថ្ងៃទៅ ៦ ថ្ងៃ និងពិន័យជាប្រាក់ពី ១ ០០០ រៀលដល់ ១០ ម៉ឺនរៀល។
រាជរដ្ឋាភិបាលកម្ពុជាដែលមានក្រសួងធម្មការនិងសាសនាជាសេនាធិការ កំពុងរៀបចំច្បាប់ស្ដីអំពីសិទ្ធិសេរីភាពជំនឿក្នុងព្រះរាជាណាចក្រកម្ពុជា សំដៅថែរក្សាសណ្ដាប់ធ្នាប់និងសន្ដិសុខសង្គម ទាក់ទងនឹងជំនឿលើសាសនា ព្រលឹង វិញ្ញាណជាដើម។ ច្បាប់នេះអាចនឹងចេញនៅក្នុងឆ្នាំ២០២៥នេះ។
គិតត្រឹមឆ្នាំ២០២៤ ប្រទេសកម្ពុជាមានវត្តអារាមចំនួន ៥ ១៤៦ វត្ត ដោយក្នុងនោះគណៈមហានិកាយ មានចំនួន៤ ៨៧៦ វត្ត និងគណៈធម្មយុត្តិកនិកាយមានចំនួន ២៧២ វត្ត។ ប្រទេសកម្ពុជាមានព្រះសង្ឃសរុប ៧១ ១៧៤ អង្គ ក្នុងនោះគណៈមហានិកាយមានព្រះសង្ឃ ៦៨ ៦៥៩ អង្គ៕