សម្តេចធិបតី ហ៊ុន ម៉ាណែត ជួបពិភាក្សាការងារជាមួយគណៈប្រតិភូ សភាសហរដ្ឋអាម៉េរិក
នារសៀលថ្ងៃទី១៧ ខែកុម្ភៈ ឆ្នាំ២០២៥ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានជួបពិភាក្សាការងារជាមួយគណៈប្រតិភូសភាសហរដ្ឋអាម៉េរិក នៅវិមានសន្តិភាព រាជធានីភ្នំពេញ។
សមាសភាពនៃគណៈប្រតិភូសភាសហរដ្ឋអាម៉េរិក រួមមានលោក Jimmy Panetta សមាជិកសភាប្រចាំរដ្ឋកាលីហ្វ័រញ៉ា មកពីគណបក្សប្រជាធិបតេយ្យ លោក Salud Carbajal សមាជិកសភាប្រចាំរដ្ឋកាលីហ្វ័រញ៉ា មកពីគណបក្សប្រជាធិបតេយ្យ លោក Darin Lahood សមាជិកសភាប្រចាំរដ្ឋអ៊ីលីណយ មកពីគណបក្សសាធារណរដ្ឋ និង សហការី។
ក្នុងឱកាសនៃជំនួប គណៈប្រតិភូសភាសហរដ្ឋអាម៉េរិកបានសម្ដែងនូវការកោតសរសើរ ចំពោះការរីកចម្រើនយ៉ាងឆាប់រហ័សរបស់ប្រទេសកម្ពុជា និងបានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងសហរដ្ឋអាម៉េរិកនិងកម្ពុជា ដោយបានកត់សម្គាល់អំពីទំនាក់ទំនងកាន់តែរឹងមាំរវាងប្រទេសទាំងពីរ ក្នុងរយៈពេលប៉ុន្មានឆ្នាំកន្លងមកនេះ ស្របពេលដែលឆ្នាំនេះក៏ជាខួបទី ៧៥ ឆ្នាំនៃទំនាក់ទំនងការទូតសហរដ្ឋអាម៉េរិក-កម្ពុជាផងដែរ។
គណៈប្រតិភូសភាសហរដ្ឋអាម៉េរិកក៏បានបង្ហាញនូវជំនឿជឿជាក់ថា ក្រោមការដឹកនាំរបស់សម្ដេចធិបតី ហ៊ុន ម៉ាណែត កម្ពុជានឹងមានការអភិវឌ្ឍនិងរីកចម្រើនបន្ថែមទៀត។ គណៈប្រតិភូក៏បានគូសបញ្ជាក់អំពីការបន្តធ្វើការជាមួយរដ្ឋាភិបាលសហរដ្ឋអាម៉េរិក ឱ្យកាន់តែយល់ដឹងច្បាស់អំពីកម្ពុជា ដើម្បីជំរុញការពង្រឹងទំនាក់ទំនង និងកិច្ចសហប្រតិបត្តិការក្នុងភាពជាដៃគូសហរដ្ឋអាម៉េរិក-កម្ពុជា ឱ្យកាន់តែរឹងមាំបន្ថែមទៀត។
ជាការឆ្លើយតប សម្ដេចធិបតី ហ៊ុន ម៉ាណែត បានសម្ដែងនូវការពេញចិត្តនិងវាយតម្លៃខ្ពស់ចំពោះភាពរីកចម្រើននៃទំនាក់ទំនង និងកិច្ចសហប្រតិបត្តិការដ៏ល្អរវាងកម្ពុជា-សហរដ្ឋអាម៉េរិក និងបានថ្លែងអំណរគុណចំពោះរដ្ឋាភិបាលនិងប្រជាជនសហរដ្ឋអាម៉េរិក ដែលបានចូលរួមគាំទ្រដល់ដំណើរការអភិវឌ្ឍសង្គម-សេដ្ឋកិច្ចកម្ពុជា។
សម្ដេចធិបតីក៏បានគូសបញ្ជាក់ផងដែរថា ដំណើរទស្សនកិច្ចរបស់គណៈប្រតិភូសភាសហរដ្ឋអាម៉េរិកនាឱកាសនេះ ក៏ដូចជាការផ្លាស់ប្ដូរដំណើរទស្សនកិច្ចជាញឹកញ៉ាប់ រវាងមន្ត្រីជាន់ខ្ពស់នៃប្រទេសទាំងពីរនាពេលកន្លងមក នឹងចូលរួមចំណែកបន្ថែមទៀតក្នុងការជំរុញការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំ និងលើកកម្ពស់ទំនាក់ទំនងប្រទេសទាំងពីរ ឱ្យឈានដល់កម្រិតខ្ពស់បន្ថែមទៀត។
ក្នុងជំនួបនេះផងដែរ សម្ដេចធិបតី ហ៊ុន ម៉ាណែត និងគណៈប្រតិភូសភាសហរដ្ឋអាម៉េរិក ក៏បានពិភាក្សាពីការពង្រឹងនិងពង្រីកកិច្ចសហប្រតិបត្តិការ រវាងប្រទេសទាំងពីរឱ្យកាន់តែល្អប្រសើរនិងរឹងមាំបន្ថែមទៀត លើវិស័យនយោបាយ សេដ្ឋកិច្ច ពាណិជ្ជកម្ម វិនិយោគ អប់រំ សុខាភិបាល ការពារជាតិនិងសន្តិសុខ និង ការបោសសម្អាតមីនជាដើម៕
评论被关闭。