កម្ពុជានិងម៉ាដាហ្កាស្កាបង្កើតក្របខណ្ឌកិច្ចសហប្រតិបត្តិការធនាគារកណ្តាល
នាថ្ងៃទី១៨ ខែកុម្ភៈ ឆ្នាំ២០២៥ ធនាគារជាតិនៃកម្ពុជានិងធនាគារកណ្តាលនៃប្រទេសម៉ាដាហ្កាស្កា បានចុះអនុស្សរណៈនៃការយោគយល់គ្នា ដើម្បីបង្កើតក្របខណ្ឌកិច្ចសហប្រតិបត្តិការរវាងធនាគារកណ្តាលទាំងពីរ។
ពិធីចុះអនុស្សរណៈនៃការយោគយល់គ្នាទ្វេភាគីនេះ ធ្វើឡើងនៅរាជធានីភ្នំពេញ ដោយមានលោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា និងលោក Hon. Aivo H. Andrianarivelo ទេសាភិបាលធនាគារកណ្តាលម៉ាដាហ្កាស្កាជាហត្ថលេខី។
ថ្លែងក្នុងពិធីចុះហត្ថលេខា លោក Hon. Aivo H. Andrianarivelo បានលើកសរសើរនិងវាយតម្លៃខ្ពស់ចំពោះការអភិវឌ្ឍសេដ្ឋកិច្ច និងប្រព័ន្ធធនាគារនៅកម្ពុជា ជាពិសេសប្រព័ន្ធទូទាត់បាគង ព្រមទាំងការគរពូនទុនបម្រុងអន្តរជាតិ។ លោកក៏បានបង្ហាញនូវសុទិដ្ឋិនិយមចំពោះកិច្ចសហប្រតិបត្តិការជាមួយធនាគារជាតិនៃកម្ពុជា ដែលនឹងផ្តល់អត្ថប្រយោជន៍ដល់ប្រទេសទាំងពីរទៅវិញទៅមក ទាំងផ្នែកសេដ្ឋកិច្ចនិងផ្នែកសង្គម។
ជាការឆ្លើយតប លោកស្រី ជា សិរី បានផ្តល់បដិសណ្ឋារកិច្ច និងបង្ហាញការស្វាគមន៍យ៉ាងកក់ក្តៅដល់គណៈប្រតិភូធនាគារកណ្តាលម៉ាដាហ្កាស្កា ដែលបានចាប់អារម្មណ៍សិក្សាស្វែងយល់អំពីប្រព័ន្ធប្រតិបត្តិការរបស់ធនាគារជាតិនៃកម្ពុជា ជាពិសេសប្រព័ន្ធទូទាត់បាគង ខណៈមានប្រទេសជាច្រើនបានមកសិក្សាស្វែងយល់ពីបទពិសោធន៍លើការអភិវឌ្ឍប្រព័ន្ធបាគង និងការតភ្ជាប់ប្រព័ន្ធទូទាត់ជាមួយប្រទេសនានាជាច្រើន
លោកស្រីក៏បានបង្ហាញការតាំងចិត្តក្នុងការបង្កើនកិច្ចសហប្រតិបត្តិការទ្វេភាគីឱ្យកាន់តែប្រសើរថែមទៀត ជាពិសេសរំពឹងថានឹងអាចតភ្ជាប់ប្រព័ន្ធទូទាត់ឆ្លងដែនជាមួយម៉ាដាហ្កាស្កានាពេលខាងមុខ៕