កម្ពុជា-ចិនរៀបចំពិធីផ្លាស់ប្ដូរវប្បធម៌ ពិព័រណ៍រូបភាពនិងអាហារ នៅអាកាសយានដ្ឋានអន្តរជាតិសៀមរាប-អង្គរ
នារសៀលថ្ងៃទី២២ ខែកុម្ភៈ ឆ្នាំ២០២៥ កម្ពុជានិងចិនបានរួមគ្នារៀបចំព្រឹត្តិការណ៍ផ្លាស់ប្ដូរវប្បធម៌ និងពិព័រណ៍រូបភាព និងការភ្លក្សម្ហូបអាហាររបស់ទីក្រុងប៉េកាំង ក្រោមប្រធានបទ “សួស្ដីប៉េកាំង” នៅអាកាសយានដ្ឋានអន្តរជាតិសៀមរាប-អង្គរ ខេត្តសៀមរាប។
កម្មវិធីនេះមានការចូលរួមពីលោក អ៊ីន លី (Yin Li) សមាជិកការិយាល័យនយោបាយមជ្ឈិមបក្សកុម្មុយនីស្ដចិន លោកស្រី ជា សិរី ទេសាភិបាលធនាគារជាតិនៃកម្ពុជា លោក វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជា លោក ប្រាក់ សោភ័ណ អភិបាលខេត្តសៀមរាប និង ថ្នាក់ដឹកនាំនិងប្រតិភូនៃប្រទេសទាំងពីរជាច្រើនរូបទៀត។
ថ្លែងក្នុងពិធីនោះ លោក វ៉ាង វិនពីន បានលើកឡើងថា រយៈពេលប៉ុន្មានឆ្នាំកន្លងទៅនេះ ក្រោមកិច្ចទំនាក់ទំនងល្អរវាងប្រមុខថ្នាក់ដឹកនាំប្រទេសទាំងពីរ ធ្វើឱ្យកិច្ចសហប្រតិបត្តិការនិងចំណងមិត្តភាពកាន់តែល្អប្រសើរឡើងជាបន្តបន្ទាប់។ ចំពោះការដឹកនាំប្រតិភូការិយាល័យនយោបាយមជ្ឈិមបក្សកុម្មុយនីស្ដចិនមកកាន់កម្ពុជានាពេលនេះ ក៏ជាប្រវត្តិសាស្ត្រថ្មីមួយបន្ថែមទៀតសម្រាប់ប្រទេសទាំងពីរ លើការបង្កើនទំនាក់ទំនងនិងពង្រឹងបន្ថែមលើការងារនយោបាយថែមទៀតផង។
លោកស្រី ជា សិរី បានមានប្រសាសន៍ថា កម្ពុជា-ចិនបានមានទំនាក់ទំនងការទូតជាមួយគ្នាអស់រយៈពេលជាច្រើនសតវត្សរ៍មកហើយ ហើយទំនាក់ទំនងនេះកាន់តែស្អិតល្មួតទ្វេឡើង ជាពិសេសនៅក្នុងរយៈពេល ៣០ ឆ្នាំចុងក្រោយនេះ ដោយមិត្តចិនបានរួមចំណែកយ៉ាងធំធេងនៅក្នុងដំណើរការអភិវឌ្ឍន៍កម្ពុជា តាមរយៈការផ្តល់ជំនួយឥតសំណង កម្ចីសម្បទាន ដើម្បីគាំទ្រដល់វិស័យអាទិភាពសំខាន់ៗជាច្រើនទៅតាមតម្រូវការរបស់កម្ពុជា ពិសេសការកសាងហេដ្ឋារចនាសម្ព័ន្ធរូបវន្ត ដូចជាផ្លូវ ស្ពាន និង បណ្តាញអគ្គិសនីជាដើម។
លោកស្រីបានមានប្រសាសន៍បន្ថែមទៀតថា ក្នុងគំនិតផ្តួចផ្តើមខ្សែក្រវាត់និងផ្លូវ ក៏មានគម្រោងធំៗមួយចំនួនដូចជា ផ្លូវល្បឿនលឿនភ្នំពេញ-ក្រុងព្រះសីហនុ អាកាសយានដ្ឋានអន្តរជាតិសៀមរាប-អង្គរ និង គម្រោងផ្លូវល្បឿនលឿនភ្នំពេញ-បាវិត ផ្លូវល្បឿនលឿនភ្នំពេញ-សៀមរាប-ប៉ោយប៉ែត ក៏នឹងអាចលេចចេញជារូបរាងនៅក្នុងពេលខាងមុខនេះដែរ ដែលគម្រោងទាំងនេះនឹងជួយលើកកម្ពស់ការតភ្ជាប់ប៉ូលសេដ្ឋកិច្ចជាតិឱ្យបានកាន់តែប្រសើរថែមទៀត។
លោក អ៊ីន លី បានបង្ហាញនូវក្ដីសោមនស្សរីករាយដែលបានមកដល់ប្រទេសកម្ពុជា ជាពិសេសទឹកដីខេត្តសៀមរាប ដែលជាតំបន់បុរាណរបស់កម្ពុជា ដែលមានសម្បត្តិវប្បធម៌ជាច្រើនសម្រាប់ទាក់ទាញវត្តមានភ្ញៀវទេសចរមកពីគ្រប់ទិសទី ហើយក៏ជាប្រភពសេដ្ឋកិច្ចជាតិមិនចេះរីងស្ងួតរបស់កម្ពុជាផងដែរ។
លោកជឿជាក់ថា ដំណើរទស្សនកិច្ចលើកនេះនឹងជាចំណែកមួយដ៏សំខាន់ ក្នុងការរឹតចំណងមិត្តភាពប្រទេសទាំងពីរឱ្យកាន់តែល្អប្រសើរបន្ថែមទៀត ទាំងវិស័យការទូតនិងវិស័យនយោបាយ។ ជាមួយនឹងកិច្ចសហប្រតិបត្តិការលើគ្រប់វិស័យនេះដែរ នឹងជួយឱ្យសេដ្ឋកិច្ចប្រទេសទាំងពីរកាន់តែល្អប្រសើរ ពិសេសសៀមរាបដែលជាខេត្តពឹងផ្អែកធំលើវិស័យទេសចរណ៍ ដែលការណ៍នេះប្រទេសចិននឹងជំរុញបន្ថែមទៀតនូវជើងហោះហើរត្រង់មកកាន់ខេត្តសៀមរាប ជាមួយនឹងការជំរុញភ្ញៀវទេសចរចិនមកកាន់ប្រទេសកម្ពុជាបន្ថែមទៀតផងដែរ។
តបតាមការអញ្ជើញរបស់រដ្ឋាភិបាលសិង្ហបុរីនិងគណបក្សប្រជាជនកម្ពុជា លោក អ៊ីន លី សមាជិកការិយាល័យនយោបាយមជ្ឈិមបក្សកុម្មុយនីស្ដចិន ដឹកនាំគណៈប្រតិភូបក្សកុម្មុយនីស្តចិនបំពេញទស្សនកិច្ចផ្លូវការនៅប្រទេសសិង្ហបុរីនិងកម្ពុជា ចាប់ពីថ្ងៃទី១៩ ដល់ថ្ងៃទី២៥ ខែកុម្ភៈ ឆ្នាំ២០២៥៕
评论被关闭。