ប្រព័ន្ធផ្សព្វផ្សាយកម្ពុជា-ចិន បញ្ជាក់ពីការបន្តនិងបង្កើនកិច្ចសហប្រតិបត្តិការ លើកកម្ពស់ប្រសិទ្ធភាពការងារផ្សព្វផ្សាយឱ្យកាន់តែល្អប្រសើរ
នាព្រឹកថ្ងៃទី៧ ខែមីនា ឆ្នាំ២០២៥ លោក នេត្រ ភក្ត្រា រដ្ឋមន្ត្រីក្រសួងព័ត៌មានកម្ពុជា បានជួបពិភាក្សាការងារជាមួយលោកស្រី ស៊ី ស៊ាវសៀ (Xu Xiaoxia) អនុប្រធានផ្នែកភាសាខ្មែរនៃមជ្ឈមណ្ឌលកម្មវិធីភាសាតំបន់អាស៊ី និងអាហ្វ្រិកនៃអគ្គស្ថានីយវិទ្យុនិងទូរទស្សន៍មជ្ឈិមចិន (CMG) រួមទាំងប្រធានគ្រប់គ្រងវិទ្យុមិត្តភាពកម្ពុជា-ចិន នៅទីស្តីការក្រសួងព័ត៌មាន រាជធានីភ្នំពេញ។
ភាគីទាំងពីរបានគូសបញ្ជាក់ពីការបន្តពង្រីកនិងបង្កើនកិច្ចសហប្រតិបត្តិការ ដើម្បីលើកកម្ពស់ប្រសិទ្ធភាពការងារផ្សព្វផ្សាយឱ្យបានកាន់តែល្អប្រសើរ ដែលកិច្ចសហប្រតិបត្តិការល្អទ្វេភាគី បានអនុវត្តស្របតាមទំនាក់ទំនងពីមិត្តដែកថែបមកជាមិត្តត្បូងពេជ្រ កម្ពុជា-ចិន។
លោក នេត្រ ភក្ត្រា បានលើកឡើងថា បច្ចុប្បន្ននេះ ទីភ្នាក់ងារសារព័ត៌មានកម្ពុជា (AKP) មានការផ្សាយជាភាសាខ្មែរ បារាំង អង់គ្លេស និង ភាសាអារ៉ាប់ ហើយចង់ឱ្យបង្កើតជាភាសាចិនមួយទៀត។ ជាមួយនេះ វិទ្យុជាតិកម្ពុជាមានកិច្ចសហប្រតិបត្តិការជាមួយវិទ្យុមិត្តភាពកម្ពុជា-ចិន ហើយវិទ្យុជាតិក៏មានកម្មវិធីផ្សាយជាភាសាបារាំងនិងអង់គ្លេស ហើយក៏ចង់ឱ្យមានកម្មវិធីផ្សាយជាភាសាចិនផងដែរ។
ក្នុងកិច្ចសហប្រតិបត្តិការក្នុងការផ្លាស់ប្តូរព័ត៌មានទៅវិញទៅមកបន្តទៅមុខទៀត លោក នេត្រ ភក្ត្រា ចង់ពង្រីកកិច្ចសហប្រតិបត្តិការរួមគ្នាលើការបកប្រែព័ត៌មានសំខាន់ៗ ដែលកើតមានឡើងនៅកម្ពុជា ពីភាសាខ្មែរទៅភាសាចិន ហើយក៏បកប្រែព័ត៌មាននៅប្រទេសចិន ពីភាសាចិនមកភាសាខ្មែរ ដែលជាក្របខណ្ឌនៃការផ្សារភ្ជាប់នូវទំនាក់ទំនងល្អរវាងប្រជាជននិងប្រជាជន តាមរយៈការផ្សព្វផ្សាយព័ត៌មានពិតនិងត្រឹមត្រូវ។
ឆ្លៀតក្នុងឱកាសនោះ លោកបានស្នើដល់ប្រព័ន្ធផ្សព្វផ្សាយ CMG ចិន ជួយលើផ្នែកបច្ចេកទេសនិងសម្ភារៈឧបករណ៍ ដើម្បីសម្រួលដល់ការផ្សព្វផ្សាយឱ្យបានកាន់តែល្អប្រសើរបន្ថែមទៀត ជាពិសេស CMG ដែលមានបណ្តាញផ្សាយជាច្រើន ជួយបង្កើនការផ្សព្វផ្សាយពីបរិបទនៃការរស់នៅរបស់ប្រជាជនកម្ពុជា ប្រពៃណី វប្បធម៌ ទំនៀមទម្លាប់ និង សម្បត្តិធម្មជាតិ ពិសេសតំបន់ទេសចរណ៍ដ៏សម្បូរបែបនៅកម្ពុជា ទៅឱ្យប្រជាជនចិនបានដឹងស៊ីជម្រៅបន្ថែមទៀត។
លោកស្រី ស៊ី ស៊ាវសៀ បានសម្តែងនូវការរីករាយដោយឃើញពីលទ្ធផលល្អនៃកិច្ចសហប្រតិបត្តិការរវាងប្រព័ន្ធផ្សព្វផ្សាយ CMG ប្រទេសចិននិងក្រសួងព័ត៌មានកម្ពុជា។ លោកស្រីបានឯកភាពបន្តពង្រឹងកិច្ចសហប្រតិបត្តិការនូវរាល់ចំណុចសំខាន់ៗ ដែលលោក នេត្រ ភក្ត្រា បានលើកឡើង ហើយត្រូវតែរួមគ្នាអនុវត្តឱ្យទទួលបានលទ្ធផលថ្មីៗបន្ថែមទៀត។
លោកស្រីបានឱ្យដឹងថា CMG គឺជាប្រពន្ធ័ផ្សព្វផ្សាយរដ្ឋរបស់ប្រទេសចិន ដែលមានទ្រង់ទ្រាយធំជាងគេ និងបានផលិតកម្មវិធីច្រើនជាងគេលើពិភពលោក តាមរយៈប្រពន្ធ័ផ្សាយ CGTN និង CCTV។ សម្រាប់វិទ្យុមិត្តភាពកម្ពុជា-ចិន គឺជាសាខាផ្សព្វផ្សាយព័ត៌មាននិងកម្មវិធីនានាមកកាន់ប្រទេសកម្ពុជា តាមរយៈ CGTN ហើយដំណើរទំហំនៃការផ្សាយរបស់ CGTN មានចំនួន ៦៨ ភាសា ដើម្បីផ្សាយទៅកាន់ពិភពលោក។
ភាគីទាំងពីរមានសុទិដ្ឋិនិយមខ្ពស់ចំពោះកិច្ចសហប្រតិបត្តិការលើប្រព័ន្ធផ្សព្វផ្សាយទ្វេភាគី កម្ពុជា-ចិន និងបានប្តេជ្ញាចិត្តធ្វើយ៉ាងណាជំរុញនិងលើកកម្ពស់ប្រសិទ្ធភាពនៃការអនុវត្តកិច្ចសហប្រតិបត្តិការនេះឱ្យកាន់តែល្អប្រសើរឡើង៕