សម្ដេចតេជោ ហ៊ុន សែន សង្ឃឹមថារុស្ស៊ី-អ៊ុយក្រែនអាចឈានដល់តុចរចាបញ្ចប់សង្គ្រាមឆាប់ៗ
សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជាបានបង្ហាញនូវក្តីសង្ឃឹមថា ប្រទេសរុស្ស៊ីនិងអ៊ុយក្រែន អាចឈានដល់តុចរចាបញ្ចប់សង្គ្រាមក្នុងពេលឆាប់ៗនេះ។
សម្តេចតេជោថ្លែងបែបនេះ ក្នុងឱកាសទទួលជួបពិភាក្សាការងារជាមួយលោក អាណាតូលី ប៉ូរ៉ូវីក (Anatoly Borovik) ឯកអគ្គរដ្ឋទូតរុស្ស៊ីប្រចាំកម្ពុជា នាព្រឹកថ្ងៃទី១៣ ខែមីនា ឆ្នាំ២០២៥ នៅវិមានព្រឹទ្ធសភា រាជធានីភ្នំពេញ។
លោក ជា ធីរិទ្ធ អ្នកនាំពាក្យព្រឹទ្ធសភាកម្ពុជា បានថ្លែងប្រាប់អ្នកសារព័ត៌មានឱ្យដឹងនៅក្រោយជំនួបថា ក្នុងឱកាសនៃជំនួប សម្ដេចតេជោ ហ៊ុន សែន នៅតែបញ្ជាក់ពីជំហររបស់សម្ដេចផ្ទាល់ ក៏ដូចជាកម្ពុជា ដែលចង់ឃើញប្រទេសរុស្ស៊ីនិងអ៊ុយក្រែន អាចស្វែងរកដំណោះស្រាយដោយសន្តិវិធី តាមរយៈកិច្ចសន្ទនានិងចរចា ដើម្បីបញ្ចប់សង្គ្រាមរវាងប្រទេសទាំងពីរដែលបានអូសបន្លាយប្រមាណជាង ៤ ឆ្នាំមកហើយ។
សម្ដេចតេជោបានប្រាប់ទៅកាន់លោកឯកអគ្គរដ្ឋទូតរស្ស៊ីថា មានតែការចរចាប៉ុណ្ណោះទើបអាចបញ្ចប់សង្គ្រាមបាន សង្ឃឹមថាការចរចារវាងភាគីពាក់ព័ន្ធនឹងឈានទៅដល់ដំណោះស្រាយ រហូតដល់បញ្ចប់សង្គ្រាមរវាងរុស្ស៊ីនិងអ៊ុយក្រែនបានឆាប់។
សម្តេចតេជោក៏បានចែករំលែកបទពិសោធនិងទស្សនៈរបស់សម្តេច លើអភិក្រមយុទ្ធសាស្ត្រគ្រប់គ្រងស្ថានការណ៍សង្គ្រាម និងយុទ្ធសាស្ត្រនៃការចរចាស្វែងរកសន្តិភាពជូនកម្ពុជា រាល់ការចរចាសន្តិភាព ដែលទទួលបានជោគជ័យ គឺត្រូវតែមានការចូលរួមពីភាគីជម្លោះពាក់ព័ន្ធ ហើយត្រូវចាប់ពីតូចទៅធំ។
សម្ដេចតេជោ ហ៊ុន សែន ក៏បានគូសបញ្ជាក់ពីការទទួលស្គាល់របស់កម្ពុជាចំពោះផលលំបាក ទុក្ខវេទនា និង រសជាតិសង្រ្គាម ព្រោះកម្ពុជាដែលជាប្រទេសធ្លាប់ឆ្លងកាត់សង្គ្រាមស៊ីវិលរាប់ទសវត្សរ៍ ដឹងយ៉ាងប្រាកដថា មិនអាចយកសង្រ្គាមទៅបញ្ចប់សង្រ្គាមបានទេ៕