សម្តេចធិបតី ហ៊ុន ម៉ាណែត និងលោកស្រី ពេជ ចន្ទមុន្នី ផ្តល់ការឧបត្ថម្ភជាប្រចាំខែដល់មណ្ឌលមែកឈើ
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកស្រីបណ្ឌិត ពេជ ចន្ទមុន្នី ផ្តល់ការឧបត្ថម្ភជាប្រចាំខែដល់កុមារកំព្រា និងកុមារមានទុក្ខលំបាកនៅមណ្ឌលមែកឈើ។
នារសៀលថ្ងៃទី៣១ ខែមីនា ឆ្នាំ២០២៥ ថវិកាចំនួន ៥ លានរៀល អង្ករចំនួន ១ តោន និង មីចំនួន ៥០ កេស ដែលជាអំណោយឧបត្ថម្ភពីសម្តេចធិបតី ហ៊ុន ម៉ាណែត និងលោកស្រី ពេជ ចន្ទមុន្នី បានប្រគល់ជូនមណ្ឌលមែកឈើ ស្ថិតក្នុងសង្កាត់កំបូល ខណ្ឌកំបូល រាជធានីភ្នំពេញ សម្រាប់ចូលរួមជួយផ្គត់ផ្គង់ដល់កុមារកំព្រានិងកុមារមានទុក្ខលំបាកប្រមាណជិត ២០០ នាក់ ដែលកំពុងរស់នៅក្នុងមណ្ឌលមែកឈើ ដែលមានលោក ផន ផល្លា ជាប្រធានមណ្ឌល។ ការផ្តល់អំណោយឧបត្ថម្ភនេះ គឺជាការផ្តល់ជាប្រចាំខែ ដោយគិតចាប់ពីពេលនេះតទៅ។
កាលពីថ្ងៃទី៦ ខែមីនា ឆ្នាំ២០២៥ កន្លងទៅ សម្តេចធិបតី ហ៊ុន ម៉ាណែត បានឆ្លៀតពេលជួបជជែកលេងជាមួយលោក ផន ផល្លា ដោយសម្តេចមានសេចក្ដីរំភើប ស្ងប់ស្ញែង និង កោតសរសើរចំពោះទឹកចិត្តនិងការតស៊ូក្នុងជីវិតរបស់លោក ផន ផល្លា រហូតបានជាប្រធានមណ្ឌលមែកឈើ ផ្ដល់សេចក្តីសុខនិងភាពកក់ក្តៅដល់ក្មេងៗរាប់រយនាក់។ សម្តេចក៏បានផ្តល់លិខិតសរសើរជូនលោក ផន ផល្លា ផងដែរ៕